خاکروبوں کی تنخواہ 17ہزار روپے مقرر کی جائے گی: جارج
بنگلورو،19؍جون(ایس اونیوز) برہت بنگلور مہانگر پالیکے میں کنٹراکٹ کی بنیاد پر کام کرنے والے خاکروبوں کو کم ا ز کم تنخواہ 17 ہزار روپے مقر رکرنے کا ریاستی حکومت نے منصوبہ بنایا ہے۔ اس سلسلے میں کل ایک میٹنگ میں فیصلہ لیا جائے گا۔ وزیر برائے ترقیات بنگلور کے جے جارج نے یہ بات بتائی۔ گاندھی نگر کے نیشنل مارکیٹ میں بی بی ایم پی کی طرف سے وزیر اعلیٰ کے نگر وتھانہ پروگرام کے تحت جڑواں کوڑے دانوں کا اجراء کرتے ہوئے انہوں نے کہاکہ شہر کی صفائی خاکروبوں کی مسلسل محنت اور لگن کا نتیجہ ہے۔انہوں نے کہاکہ فی الوقت کنٹراکٹ پر کام کرنے والے خاکروبوں کو صرف پانچ ہزار روپیوں کی تنخواہ دی جارہی ہے۔ اس سلسلے میں ریاستی وزراء ایچ آنجنیا اور ایشور کھنڈرے کے ساتھ میٹنگ کی گئی ہے۔ کابینہ میں جلد ہی کم از کم شرح اجرت کا تعین بھی کیا جائے گا اور ایک دودن میں اس سلسلے میں حکمنامہ بھی جاری کردیا جائے گا۔ انہوں نے کہا کہ شہر میں گندگی کی نکاسی کرکے بیرون مقامات پر ٹھکانے لگانے کے سبب وہاں بدبو کی شکایات موصول ہوئی ہیں، ا سی لئے محکمۂ زراعت کے تعاون سے اس مسئلے کو سلجھایا جائے گا۔شہر کی گندگی کی پروسیسنگ کیلئے سات مقامات پر کامپوزسٹ یونٹیں شروع کی جارہی ہیں۔ انہوں نے کہاکہ بعض مقامات پر گندگی سے بجلی کی تیاری کیلئے جرمنی کی ایک کمپنی نے دلچسپی ظاہر کی ہے۔ اس موقع پر میئر جی پدماوتی نے کہاکہ وزیر اعلیٰ کے نگر وتھانہ پروگرام کے تحت شہر میں 2232 مقامات پر گندگی یکجا کرنے کیلئے جڑواں بکسے نصب کئے جارہے ہیں۔اس کیلئے 4.15 کروڑ روپیوں کا گرانٹ مختص کیا گیا ہے۔ مصروف عوامی علاقوں، بازاروں ، اہم سڑکوں ، فٹ پاتھوں ، سلمس وغیرہ میں یہ باکس نصب کئے جائیں گے۔ اس موقع پر گاندھی نگر کے رکن اسمبلی اور کے پی سی سی کے کارگذار صدر دنیش گنڈو راؤ نے کہاکہ ان کا حلقہ شہر بنگلور کے مصروف علاقوں میں سے ایک ہے، یہاں بی بی ایم پی کی طرف سے گندگی کی نکاسی کیلئے باکسوں کی تنصیب خوش آئند پہل ہے۔ تقریب میں ڈپٹی میئر آنند ، ہیلتھ کمیٹی چیرمین آنند کمار ، حکمران پارٹی کے لیڈر محمد رضوان نواب دیگر کارپوریٹرس ، بی بی ایم پی کمشنر منجوناتھ پرساد ، جوائٹ کمشنر سرفراز خان اور دیگر موجود تھے۔