بنگلورو،28؍جولائی(ایس او نیوز) شہر کے میئر سمپت راج نے ٹریفک قوانین کی پاسداری پر زور دیتے ہوئے کہا ہے کہ تیز رفتار ہمیشہ حادثوں کاسبب بنتی ہے، انہوں نے کہاکہ شہر کی سڑکوں پر گاڑی چلاتے وقت انتہائی تیز رفتار اورلاپروائی کے رجحان کو ختم کیا جائے اور مصروف سڑکوں پر گاڑی کس طرح چلانی چاہئے اس کا احساس ہر ایک میں اجاگر کیا جائے۔ آج کنٹیروا اسٹیڈیم میں ٹریفک ضوابط اور روڈ سیفٹی بیداری مہم کے لئے منظم کردہ بائک ریلی کو ہری جھنڈی دکھانے کے بعد انہوں نے کہاکہ مرکزی اور ریاستی حکومتوں نے سڑکوں پر محفوظ ڈرائیورنگ کے لئے کئی قدم اٹھائے ہیں۔ ان اقدامات کے متعلق عوام میں بیداری لانے کی پہل کو میئر نے خوش آئند قرار دیا۔انہوں نے کہا کہ شہر بنگلور میں پیش آرہے مختلف سڑک حادثوں میں سالانہ چار ہزار سے زائد لوگوں کی موت ہوتی ہے۔ اس سے زیادہ تعداد میں لوگ زخمی یا معذور ہوجاتے ہیں۔ انہوں نے کہاکہ اس صورتحال پر فوری توجہ مبذول کرنی چاہئے۔ اس موقع پر بی جی ایس اسپتال کی چیف ایگزی کییٹیو آفیسر شیلجا سریش نے سڑکوں کے محفوظ استعمال اور ہنگامی حالات میں مریضوں کو فوری طور پر طبی امداد پہنچانے کے متعلق جانکاری بھی دی اور کہا کہ احتیاط سے اگر گاڑی چلائی جائے تو سڑک حادثوں کو کافی حد تک روکا جاسکتاہے۔ ریلی میں ریاستی وزیر صحت شیوانند پاٹل نے بھی حصہ لیا۔