بنگلورو، 9؍فروری (ایس او نیوز) پچھلے دنوں کمارسوامی حکومت کی طرف سے شہر بنگلور کی ترقی کی طرف توجہ نہ دینے کا الزام لگاکر کانگریس قیادت کی نظروں میں معتوب ہونے والے یشونت پور کے رکن اسمبلی اور بی ڈی اے چیرمین ایس ٹی سوم شیکھر نے کل وزیراعلیٰ ایچ ڈی کمار سوامی کی طرف سے پیش کردہ بجٹ میں شہر بنگلور کی ترقی پر دی گئی توجہ کو قابل ستائش قرار دیا۔

اخباری نمائندوں سے بات چیت کرتے ہوئے سوم شیکھر نے کہاکہ وزیر اعلیٰ نے بنگلور کی ترقی کے لئے بجٹ میں جتنی رقم کا اعلان کیا ہے اس میں وہ اپنے حلقے کے لئے بھی زیادہ سے زیادہ حصہ حاصل کرنے کی جدوجہد کریں گے۔ انہوں نے کہاکہ بجٹ میں تعلیم کی جانب خصوصی توجہ دے کر وزیراعلیٰ نے سماج کے کمزور طبقوں کو آگے بڑھنے کا موقع فراہم کیا ہے۔ بجٹ میں شعبۂ تعلیم کے لئے جو رقم مہیا کرائی گئی ہے اس کا استعمال کرتے ہوئے بھی وہ اپنے حلقے کے تعلیمی انفرااسٹرکچر کو بہتر بنانے کے لئے ان فنڈز کا استعمال کریں گے۔

انہوں نے کہاکہ بی بی ایم پی کے فنڈز حاصل کرکے وہ اپنے حلقوں میں آنے والے مختلف وارڈوں میں ترقیاتی کاموں کو تیزی سے آگے بڑھانے کے ساتھ یہاں کی بلدی سہولتوں کو بہتر بنانے کی جدوجہد کریں گے۔