ایس آر پاٹل لیجسلیٹیوکونسل کے اگلے چیرمین متوقع
بنگلورو،29؍مئی(ایس او نیوز) سینئر کانگریس لیڈر اور سابق ریاستی وزیر ایس آ ر پاٹل کو ریاستی لسجسلیٹیو کونسل کی چیرمین شپ دی جاسکتی ہے۔ حال ہی میں ریاستی کابینہ میں ردوبدل کے مرحلے میں وزیر اعلیٰ سدرامیا نے ایس آر پاٹل کو وزارت سے بے دخل کردیاتھا اس کے بعد سے انہیں کے پی سی س صدارت کے دعویداروں میں شمار کیاجارہاتھا، تاہم ان کے مقابل موجودہ کے پی سی سی صدر ڈاکٹر جی پرمیشور اور وزیر توانائی ڈی کے شیوکمار کی مضبوط دعویداری کو دیکھتے ہوئے مسٹر ایس آر پاٹل کو ریاستی لیجسلیٹیو کونسل کی چیرمین شپ دئے جانے پر سنجیدگی سے غور کیا جارہا ہے۔ موجودہ چیرمین ڈی ایچ شنکر مورتی کی میعاد جون کے اواخر میں ختم ہوجائے گی اور مرکزی حکومت کی طرف سے انہیں کسی ریاست کا گورنر مقرر کئے جانے کا امکان ہے۔ ان حالات میں کانگریس نے ایوان بالا میں اپنی اکثریت کا فائدہ اٹھاتے ہوئے ایس آر پاٹل کو چیرمین مقرر کرنے کی پہل کی ہے۔ بتایاجاتا ہے کہ وزیر اعلیٰ سدرامیا اور دیگر کانگریس لیڈران جو اس وقت دہلی میں موجودہیں ایس آر پاٹل کو یہ عہدہ دینے پر راضی بھی ہوچکے ہیں۔