بنگلورو،11؍اکتوبر(ایس او نیوز) ریاستی وزیر سیاحت سارا مہیش نے آج یہ بیان دے کر ریاست میں کانگریس جے ڈی ایس مخلوط حکومت میں اختلافات کا واضح اشارہ دیا کہ میسور کی دسہرہ تقریبات کے افتتاح کے موقع پر کانگریس لیڈران کیوں غیر حاضر تھے، اس کا جواب وہ دسہرہ کے اختتام پر دیں گے۔ اخباری نمائندوں سے بات چیت کرتے ہوئے انہوں نے کہاکہ یہ بات سچ ہے کہ دسہرہ تقریبات میں کانگریس قائدین کو مدعو نہ کئے جانے پر بیشتر قائدین ناراض ہیں ، لیکن اس سلسلے میں تفصیل دسہرہ تقریبات کے اختتام پر ظاہر کی جائے گی۔ دسہرہ تقریبات کے سلسلے میں آج میسور کے ٹاؤن ہال کے قریب روایتی دوڑ کو ہری جھنڈی دکھانے کے بعد اخبار ی نمائندوں سے بات چیت کرتے ہوئے انہوں نے کہاکہ دسہرہ کل ہی شروع ہوا ہے ، اختتام تک انتظار کیجئے ہر سوال کا جواب دیا جائے گا۔اس موقع پر جو دوڑ نکالی گئی اس نے یہاں کے کے آر سرکل ، کے آر اسپتال اور دیگر علاقوں کا احاطہ کیا۔