ایس ایم کرشنا کا پوتا کانگریس میں شامل
بنگلورو:19/اپریل(ایس او نیوز)سابق مرکزی وزیر ایس ایم کرشنا کے پوتے ڈاکٹر نرنترگنیش نے آج کانگریس کی رکنیت حاصل کی۔ پچاس سال سے بھی زیادہ وقت تک کانگریس میں رہنے کے بعد حال ہی میں ان کے دادا مسٹر ایس ایم کرشنا نے کانگریس چھوڑ کر بی جے پی کا دامن تھام لیا تھا۔ کرناٹک کانگریس کے ایگزیکٹو چیئرمین دنیش گنڈراو نے ڈاکٹر گنیش کا پارٹی میں خیر مقدم کیا۔مسٹر گنڈراؤنے صحافیوں کو بتایا کہ ڈاکٹر گنیش بغیر کسی لالچ کے پارٹی سے جڑ رہے ہیں اور وہ سددارمیا حکومت اور پارٹی کے طریقہ کار سے متاثر ہوئے ہیں۔ کانگریس میں شامل ہونے کے بعد ڈاکٹر گنیش نے کانگریس صدر سونیا گاندھی اور نائب صدر راہل گاندھی کا شکریہ ادا کیا۔ ایک سوال کا جواب دیتے ہوئے انہوں نے کہا کہ وہ آئندہ اسمبلی انتخابات میں کسی بھی اسمبلی حلقہ سے ٹکٹ نہیں مانگ رہے ہیں، لیکن اگر ان سے الیکشن لڑنے کیلئے کہا گیا تو وہ تیار ہیں۔ ان کا بنیادی مقصد پارٹی اور عوام کی خدمت کرنا ہے۔انہوں نے کہا کہ وہ غریبوں کا مفت علاج کرتے تھے اور آگے بھی ایسا کرتے رہیں گے۔