بنگلورو،15؍نومبر(ایس او نیوز؍عبدالحلیم منصور) ڈی وائی ایس پی گنپتی کی مبینہ خود کشی کے معاملے میں سی بی آئی کی طرف سے وزیر ترقیات بنگلور کے جے جارج کے خلاف ایف آئی آر درج کرنے کے معاملے پر بحث کا مطالبہ کرتے ہوئے پچھلے دو دنوں سے ریاستی اسمبلی کی کارروائیوں میں رخنہ اندازی کرنے والی بی جے پی نے آج اپنا احتجاجی دھرنا واپس لے لیا۔ بی جے پی نے اس معاملے پر تحریک التواء کے تحت بحث کا مطالبہ کیا تھا تاہم آج صبح جیسے ہی کارروائی شروع ہوئی اسپیکر کے بی کولیواڈ نے تحریک التواء کی بجائے کسی اور ضابطہ کے تحت اس مسئلے پر بحث کی اجازت دینے پر رضامندی کااعلان کیا، جس کے بعد اپوزیشن لیڈر جگدیش شٹر نے احتجاج ختم کرنے کااعلان کیا اور بی جے پی کے سبھی اراکین اپنی اپنی نشستوں پر لوٹ گئے۔ شٹر نے کہا کہ اسپیکر کے فیصلے کے مطابق وہ اس معاملے پر کسی اور ضابطہ کے تحت ایوان میں بحث کی اجازت کیلئے نوٹس دائر کرچکے ہیں اس سلسلے میں اسپیکر کی طرف سے جس ضابطہ کے تحت بحث کی اجازت دی جائے گی بی جے پی اس پر بحث کرنے کیلئے تیار ہے۔یاد رہے کہ اس معاملے پر بی جے پی نے کل اسمبلی کی کوئی کارروائی چلنے نہیں دی۔