فوج پر آر ایس ایس کے سربراہ کا بیان غلط :راہل کرناٹک کے انتخابی دورے کے دوران کانگریس صدر نے بھاگوت سے معافی کامطالبہ کیا
بنگلورو/رائچور،12؍فروری(ایس او نیوز)حیدرآباد کرناٹک علاقہ میں انتخابی مہم کے دوران کانگریس صدر راہل گاندھی راحت لیتے ہوئے سڑک کے کنارے ایک چھوٹی سی ہوٹل میں دیگر کانگریس لیڈروں کے ساتھ داخل ہوکر مرچی کی بھجیاں کھائیں اور چائے بھی پی۔ اس دوران اس دیہات کے لوگوں نے پینے کے پانی کی قلت کی شکایت بھی کی۔ بھجی اور چائے کیلئے راہل نے اس چھوٹی ہوٹل کی اونر مارا مال کو دوہزار روپئے کا نوٹ بھی دیا ۔اس چھوٹی ہوٹل میں راہل کافی خوش نظر آرہے تھے۔ اپنے ساتھیوں سے مسکراتے ہوئے باتیں کررہے تھے ۔راہل کے ساتھ اس ہوٹل میں بھجیاں کھانے اور چائے پینے والے دیگر کانگریس لیڈروں میں وزیراعلیٰ سدارامیا کے پی سی سی صدر ڈاکٹر جی پرمیشور لوک سبھا میں اپوزیشن کانگریس لیڈر ملیکاراجن کھرگے کرناٹک میں کانگریس انچارج کے سی وینوگوپال سابق مرکزی وزیرورکن راجیہ سبھا ڈاکٹر کے رحمن خان ریاستی وزیر ڈی کے شیوکمار ارکان پارلیمان کے ایچ منی اپا ،ایم ویرپاموئیلی شامل ہیں۔ اس دوران راہل ان لیڈروں سے مسکراتے ہوئے باتیں کرتے کرتے بھجی کا ذائقہ لے رہے تھے۔ چائے پانی کے اس وقفہ کے بعد اپنی روایتی بس میں سوارہوکر راہل انتخابی مہم پر چل پڑے۔کانگریس صدر کے چار روزہ جنا آشیرواددورے کا آج تیسرا دن ہے ۔ اس یاترا کے دوران راہل حیدرآباد کرناٹک کے علاقے بیدر، یادگیر ،رائچور ،کوپل، بلاری اور کلبرگی اضلاع کا احاطہ کریں گے ۔ یہ علاقے 1948 تک نظام کی حکمرانی والے حیدرآباد ریاست کا حصہ تھے ۔اپنی یاترا کے دوران جیورگی میں راہل گاندھی نے آر ایس ایس کے سربراہ موہن بھاگوت کے ریمارکس پرکڑی تنقید کی موہن بھاگوت نے اپنے ریمارکس میں کہاتھاکہ ان کا سنگھ پریوار فوج سے تیز فوجی جوان تیارکرسکتا ہے ۔ راہل نے کہا کہ ملک کی فوج کے بارے میں اس طرح کے ریمارکس غلط بات ہے ۔راہل نے کہاکہ ہمارے فوجی اس ملک کے لئے اپنا خون بہارہے ہیں ۔ سرحد پر ہمیشہ کھڑے ہوکر ملک کی حفاظت کررہے ہیں وہ ملک کے لئے اپنی جانیں قربان کررہے ہیں ۔دریں اثناء اپنی پارٹی کے سربراہ کے ریمارکس پر ہورہی تنقید کے بعد آر ایس ایس نے یہ وضاحت کی ہے کہ انہوں نے سنگھ پریوار کو ملک کی فوج کے ساتھ موازنہ نہیں کیا تھا ۔ کل بہار میں آر ایس ایس ورکرس کے ایک اجلاس میں خطاب کرتے ہوئے بھاگوت نے بارہا کہاتھا کہ سنگھ پریوار صرف تین دنوں میں فوجی جوان تیار کرسکتی ہے۔ جبکہ فوج یہ کام کرنے 6تا7 مہینے لیتی ہے ۔
راہل گاندھی نے آج اپنے مندروں کے دوروں کا دفاع کرتے ہوئے کہاکہ مندروں اورمذہبی مقامات کو ان کے دورے جاری رہیں گے ۔انہوں نے کہاکہ میں مندروں کو جاؤں گاجہاں کہیں مجھے مذہبی مقامات ملیں گے میں جاؤں گا۔وہاں جانے پرمجھے خوشی اورسکون ملتا ہے ۔نامہ نگاروں سے انہوں نے کہاکہ میں مندروں کا دورے جاری رکھوں گا۔