وینکیانائیڈوکے خلاف ممبرپارلیمنٹ نے لکھی فیس بک پوسٹ،پارلیمنٹ نے کی مذمت
نئی دہلی،09؍ فروری (ایس او نیوز؍آئی این ایس انڈیا)راجیہ سبھامیں جمعہ کو مختلف جماعتوں کے ارکان پارلیمنٹ نے سوشل نیٹ ورکنگ سائٹ فیس بک پر ہاؤس کے اسپیکر ایم وینکیا نائیڈو کی تنقید کی مذمت کی۔اس نامعلوم ایم پی سے معافی کا مطالبہ کیا، جس نے فیس بک پر تنقید ی تبصرہ پوسٹ کیاہے۔ایوان بالا کی کاروائی شروع ہونے کے بعدہی سماجوادی پارٹی کے نریش اگروال نے اس مسئلے کو ہاؤس میں اٹھایا۔ انہوں نے کہاہے کہ تمام ارکان چیئرمین کا احترام کرتے ہیں اور ہاؤس کوچلانے کولے کرایک ممبرکے ذریعہ چیئرمین پرجانب داری کاالزام لگانا غلط اور ناقابل قبول ہے۔اگروال نے ایم پی کا نام نہیں لیا لیکن انہوں نے کہا کہ فیس بک پر نائب صدر پر تنقید کرنے کے لئے اس رکن کو چیئرمین سے معافی مانگنی چاہئے۔ساتھ ہی انہوں نے صدر کو خطاب کرتے ہوئے کہا کہ ہاؤس کے ہر رکن آپ کا احترام کرتے ہیں اور آپ سے ہمیشہ ارکان کو انصاف ملا ہے۔بی جے پی کے رکن بھوپندر یادو نے کہا کہ سیاسی اختلافات ہوسکتے ہیں لیکن اس طرح کے سوشل میڈیا پر تبصرہ کرناچیئرمین کی توہین ہے۔ انہوں نے بھی تبصرہ کرنے والے ایم پی سے ہاؤس میں معذرت کرنے کی اپیل کی ہے۔حزب اختلاف کے رہنما اور کانگریس لیڈر غلام نبی آزادنے کہا کہ یہ غیر معمولی کام ہے اور کانگریس پارٹی نے اس کی سخت ترین الفاظ میں مذمت کی ہے۔ ترنمول کانگریس کے رکن پارلیمنٹ ڈیرک اوبرین نے کہا کہ تمام اراکین چیئرمین کی جانب سے کافی وقت دیاجاتاہے اور مجھے نہیں لگتا کہ کسی کوسوشل میڈیا پر جانے کی ضرورت ہے۔کسی بھی رکن نے اس رکن کا نام نہیں لیا جنہوں نے نائب صدر کے خلاف فیس بک پر تبصرہ کیا۔وہیں چیئرمین ایم وینکیا نائیڈو نے کچھ بھی نہیں کہا۔