پنجاب نیشنل بینک کی ممبئی شاخ میں سامنے آیا 11,547 کروڑ روپے کا گھپلا
نئی دہلی13 فروری (ایس او نیوز؍آئی این ایس انڈیا)بھارت میں دوسرے سب سے بڑے نیم سرکاری بینک پنجاب نیشنل بینک کا کہنا ہے کہ ممبئی میں واقع اس کی ایک شاخ میں قریب 1.8 ارب امریکی ڈالر کا گھوٹالہ نظر میں آیا ہے، جس کا اثر کچھ دیگر بینکوں پر بھی پڑ سکتا ہے۔ ایک ویب سائٹ میں شائع خبر کے مطابق بدھ کو سی بی کو دی گئی اطلاعات میں بینک نے کہا ہے کہ پنجاب نیشنل بینک نے دھوکہ دہی کے لئے غیر مجازی طور پر کئے گئے کچھ لین دین ممبئی واقع اپنی ایک شاخ میں پکڑے ہیں، جو کچھ منتخب اکاؤنٹ ہولڈروں کو فائدہ پہنچانے کے لئے کئے گئے تھے۔اگرچہ پنجاب نیشنل بینک نے گھوٹالے میں شامل کسی شخص یا کمپنی کا نام نہیں لیا ہے، لیکن اس کا دعوی ہے کہ اس نے اس گھوٹالے کے سلسلے میں جانچ ایجنسیوں کو اطلاع دے دی ہے۔ بینک نے کہا کہ وہ اس بات کا اندازہ بعد میں کرے گا کہ ان کے لین دین کی وجہ سے اس کی کوئی ذمہ داری بنتی ہے یا نہیں۔ پنجاب نیشنل بینک نے ان بینکوں کا بھی نام نہیں لیا ہے، جن پر ان کے لین دین کی وجہ سے اثر پڑ سکتا ہے۔ جعل سازی کے ذریعہ کئے گئے یہ لین دین بینک کے سال 2017 کی خالص آمدنی (13.2 ارب روپے) کی آٹھ ضرب رقم کے برابر ہے ۔ ممبئی میں اس خبر کے سامنے آنے کے بعد پنجاب نیشنل بینک کا شیئر شام 11:20 بجے تک 7.5 فیصد تک لڑھک گیا تھا اور اکتوبر، 2017 کے بعد سب سے کم قیمت پر کاروبار کر رہا تھا۔