نئی دہلی، 18 فروری(ایس او نیوز؍آئی این ایس انڈیا)سونیا گاندھی کے داماد اور پرینکا گاندھی کے شوہر رابرٹ واڈرا نے اعلان کیا ہے کہ وہ اس بار پلوامہ میں دہشت گردانہ حملے کی وجہ سے اپنی سالگرہ نہیں منائیں گے۔ واڈرا نے کہا کہ وہ ایسا شہیدوں کے احترام میں کررہے ہیں۔ رابرٹ اور پرینکا کی شادی 18 فروری 1997 میں ہوئی ہے۔رابرٹ نے اس بارے میں پیر کو ایک فیس بک پوسٹ لکھی اور اس میں اپنی اور پرینکا گاندھی کی تصویر پوسٹ کی۔ اس پوسٹ میں پلوامہ حملے میں شہید ہوئے جوانوں کی تصویر بھی ہے. اس پوسٹ میں انہوں نے لکھا کہ پلوامہ حملے میں شہید ہوئے لوگوں کے اہل خانہ کے تئیں ان کی ہمدردی ہے۔ انہوں نے شہداء کے اہل خانہ کو اپنا پیغام بھی بھیجاہے۔اس سے پہلے کانگریس کے پارٹی صدر راہل گاندھی نے بھی پلوامہ حملے کے بعد اپنے پروگراموں کو کچھ دنوں کے لئے ٹالنے کا اعلان کیا تھا۔ ان کی بہن پرینکا گاندھی نے بھی لکھنؤ میں ہونے والی ان کی پہلی پریس کانفرنس کو ٹال دیا تھا۔ پرینکا نے کہا تھا کہ پلوامہ میں ہوئے حملے کی وجہ سے ملک سوگ میں ہے اور ایسے ماحول میں سیاست کی بات کرنا ٹھیک نہیں رہے گا۔ وہیں راہل گاندھی نے کانگریس کی جانب سے پریس کانفرنس کر کے کہا تھا کہ اپوزیشن اس معاملے میں حکومت اور فوج کے ساتھ کھڑی ہے۔