نئی دہلی،25 مارچ (ایس او نیوز؍آئی این ایس انڈیا) دہلی ہائی کورٹ نے پیر کو ای ڈی سے پوچھا کہ کیا رابرٹ واڈرا کے خلاف منی لانڈرنگ کیس منسوخ کرنے کے مطالبے والی پٹیشن سماعت کے قابل ہے۔اس معاملے میں جانچ ایجنسی نے واڈرا سے پوچھ گچھ کی ہے۔ای ڈی نے واڈرا کی درخواست کی مخالفت کرتے ہوئے کہا کہ انہوں نے حقائق کو جان بوجھ کر چھپایا ہے اس لیے انہیں کوئی راحت نہیں دی جانی چاہئے۔ مرکز اور ای ڈی کی جانب سے پیش سالیسٹر جنرل تشار مہتہ نے کہا کہ واڈرا کی پٹیشن سماعت کے قابل نہیں ہے اور یہ قانون کے عمل کا غلط استعمال ہے۔جسٹس ہما کوہلی اور جسٹس ونود گوئل کی بنچ نے جانچ ایجنسی سے دو ہفتے کے اندر اس بارے میں ایک حلف نامہ داخل کرنے کو کہا کہ واڈرا اور ان کے اسسٹنٹ منوج ارورہ کے دو مختلف لیکن ایک جیسی عرضیاں سماعت کے قابل ہیں یا نہیں۔ساتھ ہی عدالت نے معاملے کی اگلی سماعت دو مئی کو طے کر دی۔ای ڈی کا معاملہ لندن میں 12، برائنسٹون چوک میں واقع، 19 ملین پاؤنڈ قیمت کی ایک جائیداد خریدنے میں منی لانڈرنگ کے الزامات سے متعلق ہے۔اس جائیداد کی ملکیت واڈرا کے پاس ہے۔معاملے میں واڈرا کی نمائندگی سینئر وکیل ابھیشیک منو سنگھوی کر رہے ہیں۔واڈرا نے منی لانڈرنگ روک تھام ایکٹ 2002 کے کچھ دفعات کو غیر آئینی قرار دئے جانے کا مطالبہ بھی کیا ہے۔