نئی دہلی، 20 فروری(ایس او نیوز؍آئی این ایس انڈیا) کانگریس جنرل سکریٹری پرینکا گاندھی کے شوہر رابرٹ واڈرا منی لانڈرنگ کیس میں بدھ کوای ڈی کے سامنے پیش ہوئے، حکام نے یہ معلومات دی۔حکام نے بتایا کہ واڈرا صبح 10 بج کر 30 منٹ پر اپنے وکلاء کے ساتھ وسط دہلی کے جام نگر واقع ایجنسی کے دفتر پہنچے۔واڈرا کے خلاف بیرون ملک پراپرٹی خریداری میں منی لانڈرنگ سے متعلق مجرمانہ شکایت درج ہے۔

واڈرا صحت کی وجوہات کے سبب منگل کو پیش نہیں ہوئے تھے۔ای ڈی نے اس معاملے میں اس مہینے کے آغاز میں واڈرا سے تین دن کے دوران 23 گھنٹے پوچھ گچھ کی تھی۔دہلی کی ایک عدالت نے انہیں مرکزی تفتیشی ایجنسی کی تحقیقات میں تعاون کرنے کیلئے کہا تھا۔بتا دیں کہ کہ واڈرا کے خلاف ای ڈی کا کیس لندن میں جائیداد کی خریداری میں منی لانڈرنگ سے منسلک ہے۔ان پر براینسٹن اسکوائر میں 1.9 ملین جی بی پی (برطانوی پاؤنڈ) کی جائیداد خریدنے کا الزام ہے۔ایجنسی نے عدالت کو بتایا تھا کہ اسے لندن میں مختلف نئی جائیداد کی معلومات ملی ہے، جن کا تعلق واڈرا سے ہے،ان میں دو گھر شامل ہیں، ایک گھر کی قیمت پانچ ملین پاؤنڈ اور دوسرے گھر کی قیمت چار ملین پونڈ ہے۔اس کے علاوہ چھ دیگر فلیٹ اور دیگر املاک ہیں۔ان تمام معاملات میں واڈرا خودکو بے قصور بتا رہے ہیں۔اس سے پہلے واڈرا جے پورای ڈی دفتر میں بھی راجستھان میں زمین خریدنے کے معاملے میں پیش ہو چکے ہیں،کچھ دن پہلے ہی واڈرا نے جانچ کے نام پر ذہنی طور پر ہراساں کرنے کا الزام لگایا تھا۔