بھٹکل 4/فروری (ایس او نیوز) بھٹکل میں چوری کی وارداتیں تھمنے کا نام نہیں لے رہی ہے، بالخصوص بندرروڈ فرسٹ کراس پر واقع خالی گھروں کو چور اپنا نشانہ بنانے میں لگے ہوئے ہیں، ایک کے بعد ایک چوری کی وارداتوں سے ایک طرف بھٹکل کے عوام کا گھروں سے باہر نکلنا محال ہوگیا ہے، وہیں چوریوں پر قابو پانے میں پولس بھی ناکام ہے ، جس پر سوالیہ نشان لگایا جارہا ہے۔
تازہ واردات بندرروڈ فرسٹ کراس پر جناب محمد حنیف بیلی کے مکان پر پیش آئی ہے، جہاں چوروں کو گھر کی مکمل تلاشی کے بائوجود جب کچھ ہاتھ نہیں ملا تو ایک کنارے رکھے ہوئے UPS (بیٹری بیک آپ) کو اُٹھا لے گئے ہیں۔
گھروالوں نے بتایا کہ گھر پر کوئی نہیں رہتا، حنیف اور اُس کی فیملی دبئی میں رہائش پذیر ہے، البتہ بھٹکل میں موجود اُن کا بھائی گھر کی دیکھ ریکھ کے لئے آتا جاتا رہتا ہے۔
پتہ چلا ہے کہ چور روشن دان پر لگی ہوئی جالی کو کاٹ کر گھر کے اندر داخل ہوئے ہیں اور سبھی الماریوں کو کھول کر تلاشی لی گئی ہے، کپڑے اور دیگر الماری کے اندر کے سامان باہر بکھرے پڑے تھے۔ البتہ الماری میں زیورات یا نقد رقم نہیں موجود نہیں تھی، جس کی وجہ سے UPS اُٹھالے گئے۔ حنیف کے بھائی محمد اسماعیل بیلی کے مطابق ایک ہفتہ قبل بھی اُسی روشن دان کے ذریعے چور اندر داخل ہوکر ایک ایل جی موبائل چوری کرچکے ہیں، مگر انہوں نے یہ سوچ کر کہ صرف ایک موبائل چوری ہوا ہے، پولس میں کوئی شکایت درج نہیں کرائی۔ البتہ آج پھر ایک بار چوری کی واردات پیش آئی تو ٹائون پولس تھانہ کو واقعے کی جانکاری دی۔
اطلاع ملتے ہی ٹائون پی ایس آئی اپنی ٹیم کے ساتھ موقع واردات پر پہنچے اورتفصیلات حاصل کرتے ہوئے شکایت درج کی۔ پولس مزید چھان بین کررہی ہے۔