مہاراشٹرا کے ستارہ نیشنل ہائی وے پر کار حادثے کا شکار؛ بھٹکل کی ایک خاتون جاں بحق
بھٹکل 2/نومبر (ایس او نیوز) مہاراشٹرا کے ستارہ ٹول ناکہ کے قریب پیش آئے ایک سڑک حادثہ میں بھٹکل کی ایک خاتون جاں بحق ہوگئی جبکہ دیگر تین لوگ زخمی ہوگئے جنہیں قریبی اسپتال لے جایا گیا ہے۔
اطلاع کے مطابق تین کاروں پر سوار بھٹکل کے ایک ہی خاندان کے لوگ تفریح کے لئے مہاراشٹرا کے مختلف علاقوں کا دورہ کرنے کے بعد آج جمعرات بھٹکل واپس جانے کے لئے نکلے تھے کہ ان کی ایک کار ٹول ناکہ کے قریب پارک کی ہوئی لاری سے ٹکراگئی۔ ٹکر اتنی شدید تھی کہ کار پر سوار ایک خاتون نے دم توڑ دیا جس کی شناخت بھٹکل کے معروف تاجر جناب مظفر کولا کی اہلیہ امنہ مظفر کولا (63) کی حیثیت سے کی گئی ہے۔
ذرائع کے مطابق جناب مظفر کولا کے فرزند عبداللہ کولا کار کی ڈرائیونگ کررہے تھے، حادثے میں وہ بھی زخمی ہوئے ہیں۔دوسری کار پر سوار شبیب کولا نے ساحل آن لائن سے فون پر گفتگو کرتے ہوئے بتایا کہ متعلقہ کار پر سوار ان کی اہلیہ کے سر کو بھی چوٹ لگی ہے،جبکہ ان کے بھائی شعور کولا کی کمر کو کافی چوٹ لگی ہے۔ البتہ تینوں لوگ خطرے سے باہر ہیں۔
حادثہ جمعرات اور جمعہ کی درمیانی شب قریب دو بجے پیش آیا۔
حادثے میں محترمہ آمنہ کولا کے انتقال کی خبر ملتے ہی دبئی اور مسقط میں مقیم ان کے فرزندان ، داماد و دیگر رشتے دار بھٹکل جانے کے لئے روانہ ہوگئے ہیں۔ اللہ مرحومہ کی بال بال مغفرت فرمائے اور اہل خانہ کو صبر جمیل عطا فرمائے۔ اٰمین
صبح قریب چار بجے کاغذی کاروائیوں کے بعد میت گھروالوں کے حوالے کی گئی ۔ آخری اطلاع ملنے تک میت کو بھٹکل لے جانےکے لئے تیاریاں جاری تھی۔ جالی روڈ پر واقع جناب مظفر کولا کی رہائش گاہ پر میت لے جائی جائے گی۔ خیال رہے کہ ستارہ ممبئی سے قریب ڈھائی سو کلو میٹر کے فاصلے پر ہے۔