پٹنہ،27؍جون(ایس او نیوز؍آئی این ایس انڈیا)جنتا دل یو (جے ڈی یو)کے ساتھ لفظی جنگ کے درمیان آر جے ڈی نے اپنے ایک ترجمان کو ہٹا دیا اور اپنے ایک بڑبولے ممبر اسمبلی بھائی بیریندر کو خبردار کیا جو وزیر اعلی نتیش کمار پر نشانہ سادھے ہوئے تھے۔بہار کے آر جے ڈی سربراہ رام چندر پربے نے اشوک سنہا کو عہدے سے ہٹا دیا جو بطور ترجمان اکثر نیوز چینلز پر پارٹی کے خیالات رکھتے دیکھے جاتے تھے۔منیر سے رکن اسمبلی بھائی بیریندر کو بھی رابڑی دیوی کے 10سرکلر روڈ رہائش گاہ پر طلب کیا گیا۔ریاست میں مہاگٹھ بندھن کی دونوں پارٹیوں کے درمیان لفظی جنگ آر جے ڈی سربراہ لالو پرساد یادو کے اس تبصرے سے شروع ہوا تھا جس میں انہوں نے صدارتی امیدوار رام ناتھ کووند کی حمایت کرنے کے جنتا دل یو کے فیصلے کوتاریخی بھول قرار دیا تھا۔جنتا دل یو چیف نتیش کمار نے بھی یہ واضح کر دیا تھا کہ وہ اپنے فیصلے سے پیچھے ہٹنے نہیں جا رہے ہیں۔آر جے ڈی کے نائب صدر رگھونش پرساد سنگھ اور ممبر اسمبلی بھائی بیریندر، نتیش کمار اور جنتا دل یو کے خلاف تبصرہ کرنے کا کوئی موقع نہیں جانے دیتے تھے لیکن معاملے نے اس وقت سنگین موڑ لے لیا جب نائب وزیر اعلی تیجسوی یادو نے سوشل میڈیا پر تبصرہ جسے نتیش کمار کے خلاف دیکھا گیا۔