واشنگٹن، 15نومبر (ایس او نیوز؍آئی این ایس انڈیا)امریکی وزیرخارجہ ریکس ٹلرسن آج میانمار کے فوجی سربراہ سینئر جنرل مِن آؤنگ ہلائنگ سے ملاقات کر رہے ہیں۔ راکھین ریاست میں عسکری آپریشن اور اس کے نتیجے میں قریب چھ لاکھ روہنگیا باشندوں کی ہجرت کے تناظر میں میانمار کی فوج شدید عالمی تنقید کی زد میں ہے۔ امریکی محکمہ خارجہ کے مطابق اس ملاقات میں ٹلرسن میانمار پر زور دیں گے کہ وہ راکھین میں تشدد کا خاتمہ کرے۔ میانمار سے ہجرت کر کے بنگلہ دیش پہنچنے والے روہنگیا باشندوں کا الزام ہے کہ سکیورٹی فورسز ان کے خلاف تشدد، جنسی زیادتیوں اور قتل عام جسے جرائم میں ملوث ہیں۔ اقوام متحدہ کی جانب سے بھی کہا جا چکا ہے کہ راکھین میں میانمارکی فوج کا آپریشن ’نسل کشی‘ کے زمرے میں آتا ہے۔