کشمیر معاملے پر ہندوستان - پاکستان کے درمیان مذاکرات شروع کرانے کی کوشش جاری:یواین جنرل سکریٹری
نیویارک، 21؍جون(ایس او نیوز؍آئی این ایس انڈیا )ہندوستان اور پاکستان کے درمیان جاری کشیدگی کے پیش نظر اقوام متحدہ کے جنرل سکریٹری انٹونیو گٹیرس نے مسئلہ کشمیرپر بڑا بیان دیا ہے۔گٹیرس نے کہا کہ وہ مسئلہ کشمیر کو حل کرنے کے لیے ہندوستان اور پاکستان کے درمیان بات چیت کرانے کی کوشش کر رہے ہیں، اس کے لیے وہ دونوں ممالک کے وزرائے اعظم سے مسلسل ملاقات کر رہے ہیں۔گٹیرس سے پوچھا گیا تھا کہ کیا وہ کشمیر تنازعہ کے حل کی خاطر ہندوستان اور پاکستان کے درمیان مذاکرات شروع کروانے کی کوشش کر رہے ہیں؟جس کے جواب میں گٹیرس نے ہنستے ہوئے کہاکہ آخر میں پاکستان کے وزیر اعظم نواز شریف سے تین بار اور ہندوستانی وزیر اعظم نریندر مودی سے دو بار کیوں ملا ہوں؟غورطلب ہے کہ گٹیرس پر الزامات لگ رہے ہیں کہ وہ مسئلہ کشمیر کو حل کرنے اور کارروائی کرنے سے بچ رہے ہیں۔یہ بھی کہا جا رہا ہے کہ یواین جنرل سکریٹری ہندوستان اور پاکستان کے درمیان کشیدگی کو کم کرنے کے لیے اقدامات کرنے کے خواہاں نہیں ہیں۔جنوری میں عہدہ سنبھالنے کے بعد اقوام متحدہ کے ہیڈ کوارٹر میں پہلی بار پریس کانفرنس کے دوران گٹیرس سے پوچھا گیا تھا کہ ان کے جنرل سکریٹری بننے کے بعد سے ہندوستان اور پاکستان کے درمیان کشیدگی بڑھی ہے، ایل اوسی پر جنگ بندی کی خلاف ورزی میں اضافہ ہوا ہے،ایسے میں وہ اس کو کم کرنے کے لیے کیا قدم اٹھا رہے ہیں؟اس پر انہوں نے کہا کہ دونوں ممالک کو مذاکرات کی میز پر لانے کی کوشش کر رہے ہیں، حالانکہ انہوں نے یہ صاف نہیں کیا کہ وہ مسئلہ کشمیر پر ثالثی کریں گے یا نہیں؟۔قابل ذکرہے کہ جون کے آغاز میں سینٹ پیٹس برگ بین الاقوامی اقتصادی فورم سے الگ مودی اور گٹیرس نے ملاقات کی تھی، اس دوران مودی نے دہشت گردی جیسے مسائل کے چیلنجوں سے نمٹنے کی خاطرکثیر رخی بات چیت پر زور دیا تھا، جبکہ گٹیرس اور پاکستان کے وزیر اعظم نواز شریف نے جنوری میں اقتصادی فورم سے الگ داووس اور اس کے بعد اسی ماہ شنگھائی تعاون تنظیم کے اجلاس سے الگ آستانہ میں ملاقات کی تھی۔گٹیرس کے ترجمان اسٹیفن دجارک سے جب بھی کشمیر کے حالات کو لے کر جنرل سکریٹری کے جواب کے بارے میں سوال کیا گیا ۔انہوں نے بار بار یہی جواب دیا کہ علاقے کے حالات پر گٹیرس قریبی نظر رکھ رہے ہیں،اس کے حل کے لیے اقوام متحدہ کے سربراہ نے کوئی براہ راست مداخلت نہیں کی ہے، بلکہ ہندوستان اور پاکستان سے مذاکرات کے ذریعے پرامن حل نکالنے کی اپنی اپیل کو ہی دہرایاہے ۔پاکستان اقوام متحدہ میں مسلسل مسئلہ کشمیر کواٹھاتا رہا ہے اور اس تنازعہ میں مداخلت کرنے کا مطالبہ رکھتا رہا ہے۔حالانکہ ہندوستان نے ہمیشہ یہ کہا ہے کہ کشمیر اس کے اور پاکستان کے درمیان ایک دوطرفہ مسئلہ ہے،لہذا ان دونوں ممالک کو مل کر ہی اسے حل کرنا ہوگا۔