بنگلور کی تجارتی عمارتوں میں پارکنگ فیس پر پابندی ممکن
بنگلورو۔20؍دسمبر(ایس او نیوز) شہر کی مختلف اہم تجارتی عمارتوں میں گاڑیوں کی پارکنگ کے عوض بھاری رقم لئے جانے اور بی بی ایم پی کو اس میں سے کچھ ادا نہ کئے جانے کی صورتحال کو دیکھتے ہوئے ریاستی حکومت اس بات پر سنجیدگی سے غور کررہی ہے کہ شہر کی کسی بھی تجارتی عمارت میں پارکنگ فیس کی وصولی پر پابندی عائدکردی جائے۔
بتایاجاتاہے کہ آر ٹی آئی کارکن ایس امریش کی طرف سے وزیر اعلیٰ ایچ ڈی کمار سوامی سے شکایت کی گئی کہ تجارتی عمارتوں میں بھاری پارکنگ فیس وصول کی جاتی ہے اور بی بی ایم پی کوکچھ نہیں دیاجاتا۔ اس شکایت پر وزیراعلیٰ نے بی بی ایم پی حکام کو ہدایت دی ہے کہ فوری طور پر اس کا جائزہ لیا جائے اور تجارتی عمارتوں میں گاڑیوں کی پارکنگ کے لئے بھاری فیس وصول کئے جانے کے خلاف کارروائی کرنے کے ساتھ پارکنگ فیس کو منسوخ کیا جائے۔ پہلے ہی میسور سٹی کارپوریشن نے ایک قرار داد منظور کرتے ہوئے اس شہر میں تجارتی عمارتوں کی طرف سے پارکنگ فیس کی وصولی پر پابندی عائد کردی ہے اور اسے سختی سے نافذ بھی کیاگیا ہے۔ انہیں خطوط پر بنگلورمہانگر پالیکے کی حدود میں تمام تجارتی عمارتوں میں مفت پارکنگ سہولت فراہم کرنے کے متعلق بی بی ایم پی میں قرار داد منظور کی جاسکتی ہے۔ اس کے لئے ہر تجارتی عمارت پر یہ پابندی عائد کی جائے گی کہ اس میں رہنے والوں کے لئے درکار پارکنگ ریزرو کرکے بقیہ جگہ کا نقشہ بی بی ایم پی کو فراہم کرایا جائے اس جگہ پر مفت پارکنگ کے لئے منظوری دی جائے گی۔ منظوری کے بعد بھی اگر پارکنگ فیس وصول کرنے کا سلسلہ جاری رہا تو عمارتوں کے مالکوں پر کارروائی کرنے پر غور کیا جارہاہے۔ بی بی ایم پی نے سنیما گھروں اور تعلیمی اداروں میں بھی پارکنگ فیس وصول کئے جانے پر پابندی لگانے کی پہل کی ہے، اور یہ بھی متنبہ کیاہے کہ فیس پر پابندی لگانے کے بعد پارکنگ کے لئے مختص جگہ کسی اور مقصد کے لئے استعمال نہ کیا جائے، اگر ایسا کیاگیا تو متعلقہ عمارت کی تعمیر کے لئے جو پلان منظور کیا گیاہے اسے بھی منسوخ کردیا جائے گا۔