برہمنوں سمیت تمام طبقات کے مظلومین کو ریزرویشن ،ریاستی حکومت کی طرف سے منصوبہ زیر غور
بنگلورو،6؍جون(ایس او نیوز) ریاست میں کانگریس حکومت آنے والے اسمبلی انتخابات کو مدنظر رکھتے ہوئے ریاست میں ذات پات کے امتیازات سے بالاتر ہونے کی پہل کرتے ہوئے برہمن ،ویشیا سمیت سماج کے تمام مظلوم طبقات کوسرکاری ملازمتوں میں ریزرویشن دینے پر سنجیدگی سے غور کررہی ہے۔ بتایاجاتاہے کہ وزیر اعلیٰ نے اس سلسلے میں محکمہ سماجی بہبود کو نقشہ تیار کرنے کی ہدایت دی ہے ۔ فی الوقت سماج کے بہت سارے طبقات کو ریزرویشن کی سہولت نہیں مل پارہی ہے۔اس مقصد کے حصول کیلئے سدرامیا ان طبقات کو پسماندہ طبقات کے زمروں میں شامل کرکے ریزرویشن کا مستحق قرار دینے کی کوشش کررہے ہیں۔برہمن اور ویشیا طبقہ سے وابستہ غریب خاندانوں کو بھی سماجی انصاف دلانے کیلئے ریزرویشن دیا جائے گا۔ وزیر اعلیٰ سدرامیا نے یہ بھی پہل کی ہے کہ دیگر طبقات کو بھی ریزرویشن ان کی معاشی صورتحال کی بنیاد پر طے کیاجائے۔ جو لوگ معاشی طور پر خود کفیل ہیں انہیں ریزرویشن کے دائرہ سے ہٹادیا جائے۔آنے والے اسمبلی انتخابات میں اقتدار کو کسی بھی حال میں ہتیانے بی جے پی کی مبینہ کوششوں کو ناکام بنانے اور کانگریس حکومت کو برقرار رکھنے کی حکمت عملی کے تحت ملک میں پہلی بار کرناٹک میں برہمن طبقے کو ریزرویشن کے دائرہ میں لانے کی پہل کی جارہی ہے۔ حالانکہ برہمن طبقے کو ریزرویشن دینے کے متعلق بی جے پی نے بھی اب تک اپنا موقوف واضح نہیں کیا ہے۔کانگریس کے مفکرین کا ماننا ہے کہ سدرامیا کی طرف سے یہ پہل آنے والے دنوں میں کانگریس کیلئے کافی سود مند ہوگی۔