بھٹکل: 29؍اکتوبر (ایس او نیوز) تعمیراتی مزدوروں کے مسائل میں دن بدن اضافہ ہوتاجارہاہے ، حکومت فوری طورپر ضروری اقدامات اٹھانے کا مطالبہ لےکر کرناٹکا راجیا کٹّڈکٹّوو متو کلّووڈییو کواری کارمیکر سنگھ بھٹکل (تعمیراتی اور پتھر کان کنی مزدور سنگھ ) کی جانب سے بھٹکل اسسٹنٹ کمشنر کی معرفت سرکار کو میمورنڈم پیش کیا گیا ۔
میمورنڈم میں مطالبہ کیاگیا ہے کہ تعمیراتی مزدور حادثاتی معاوضہ میں 10لاکھ تک اضافہ کریں ، مزدوروں کی ماہانہ پنشن 3000 اور پنشن عرضی دینے کے لئے کوئی وقت مقرر نہ کریں۔ مزدور علاج کے اخراجات کو 5لاکھ روپئے تک بڑھائیں اور یہ سہولت ان کے خاندان والوں کو بھی فراہم کریں۔ مستفیدین کی سہولیات کو تقسیم کرنے کے لئے مدت طئے کریں۔ مزدور شادی تعاون معاوضہ کی بھی مدت میں توسیع ، ای ایس آئی اور فیوچر فنڈ منصوبہ جاری کرنے ، فطری موت معاوضہ میں 5لاکھ روپئے زیادہ کرنے کی مانگ کی گئی ہے۔ اس کے علاوہ میمورنڈم میں ہر ایک تعلقہ میں مستقل مزدور انسپکٹر کے تقرر کا مطالبہ کیاگیاہے۔ اسسٹنٹ کمشنر ساجد ملا نے میمورنڈم وصول کیا۔ سنگھ کے ضلع سکریٹری جی این ریونیکر ، راگھویندر شٹی وغیرہ موجود تھے۔