بھٹکل میں 69واں یوم ِ جمہوریہ کا شاندار جشن :طلبا و طالبات کی طرف سے ثقافتی پروگرام
بھٹکل:26/ جنوری (ایس اؤنیوز)تعلقہ انتظامیہ، تعلقہ پنچایت، بھٹکل بلدیہ اور پٹن پنچایت جالی کے اشتراک سے شہر کے نوائط کالونی میں واقع تعلقہ کھیل میدان میں 69یومِ جمہوریہ شان و شوکت کے ساتھ منایا گیا ۔
تحصیلدار وی این باڈ کر نے پرچم کشائی کے بعد خطاب کیا۔ رکن اسمبلی منکال وئیدیا نے تقریب کی صدارت کرتےہوئے کہاکہ ملک میں تمام دھرموں ، مذہبوں کے لوگ مساویانہ زندگی گزارنے کی راہیں ہموار ہونی چاہئے، ملک کو ایک بہترین دستور کی تشکیل کرنےو الے مہان ہستیوں کا آج کے دن تذکرہ کرتے ہوئے عوام میں ان کی خدمات کو پیش کرنے کی بات کہی۔ مختلف شعبہ جات میں خصوصی کارکردگیوں کو انجام دینے والی شخصیتوں کی تہنیت کی گئی ۔ تعلقہ کے مختلف اسکولوں، کالجوں کے طلبا اور محکمہ پولس کے افسران اور عملہ مارچ پاسٹ میں شریک تھے۔ اسکول اور کالج طلبا کی طرف سے ثقافتی پروگرام پیش کئے گئے۔
اسی موقع پر رکن اسمبلی منکال وئیدیا نے اپنی ایک سال کی تنخواہ 5لاکھ روپئے بھٹکل کے کوگتی سنہیا خصوصی بچوں کی اسکول کو عطیہ کیا۔ ڈائس پر بلدیہ صدر محمد صادق مٹا، تعلقہ پنچایت صدر ایشور بی نائک، نائب صدر رادھا اشوک وئیدیا، جالی پنچایت صدر عبدالرحیم شیخ، ضلع پنچایت ممبر البرٹ ڈیکوستھا، سندھو بی نائک، تعلقہ پنچایت افسر سی ٹی نائک، بی ای اؤ وینکٹیش پٹگار، ڈی وائی ایس پی شیوکمار وغیرہ موجود تھے۔
