بنگلور:16/مارچ(ایس او نیوز) بی پی ایل راشن کارڈس پر اگلے ماہ سے راشن کی فراہمی کیلئے بائیو میٹرک نظام متعارف کروایا جائے گا۔ یہ اعلان آج وزیر برائے شہری رسد وخوراک یو ٹی قادر نے کیا۔ریاستی اسمبلی میں وقفہئ سوالات کے دوران سدھاکر کے سوال کا جواب دیتے ہوئے انہوں نے کہاکہ محکمہئ شہری رسد کی طرف سے راشن کی تقسیم کیلئے جو کوپن نظام لاگو کیاگیاتھا اسے واپس لیا جارہاہے۔ انہوں نے کہاکہ فرضی راشن کارڈوں پر روک لگانے کیلئے راشن کارڈز کی فراہمی میں جدید ترین نظام اپنایا گیا ہے۔ درخواست گذاروں کی طرف سے عرضی دینے کے پندرہ دنوں کے اندر راشن کارڈ ان کے گھروں تک پہنچایا جارہا ہے، اب تک سات لاکھ سے زائد عرضیاں آن لائن دائر کی جاچکی ہیں، ان کا جائزہ لے کر اہل خاندانوں کو راشن کارڈ دئے جائیں گے۔ انہوں نے کہاکہ ملک میں پہلی بار کرناٹک کے شہری رسد نظام کے تحت راشن کارڈوں کی فراہمی کو سکالا اسکیم کا حصہ بنایا گیا ہے۔ اس مرحلے میں اپوزیشن لیڈر جگدیش شٹر نے فرضی راشن کارڈس روکنے کیلئے محکمہ کی طرف سے کارروائی کی ستائش کرتے ہوئے کہا کہ اس پر کسی کو اعتراض نہیں ہے، لیکن محکمہ کی طرف سے بار بار اگر ضوابط میں تبدیلی کی گئی تو اس سے لوگوں میں انتشار پیدا ہوگا۔ ضوابط میں بار بار تبدیلی کے سبب راشن کی تقسیم کا سلسلہ متاثر ہورہا ہے۔اس پر جواب دیتے ہوئے وزیر موصوف نے کہاکہ کسی بھی نئے نظام کو متعارف کرانے میں چند خامیوں کی نشاندہی ضرور ہوتی ہے، مرحلہ وار ان تمام کو دور کرلیا جائے گا۔