زلزلے کے جھٹکوں سے دہلا ہماچل پردیش
نئی دہلی، 27؍اگست(ایس او نیوز/آئی این ایس انڈیا)ہماچل پردیش میں آج صبح 4.6شدت کا ایک زلزلہ آیا جس کے بعد شملہ اور کلو اضلاع میں گھبراہٹ میں آئے لوگ اپنے اپنے گھروں سے باہر نکل آئے۔زلزلے کی وجہ سے کچھ پرانی عمارتوں میں دراڑیں آ گئیں، جبکہ جان و مال کے کسی بڑے نقصان کی ابھی کوئی اطلاع نہیں ہے۔مقامی محکمہ موسمیات کے ڈائریکٹر منموہن سنگھ نے بتایا کہ زلزلہ صبح 6بج کر 46منٹ پر آیا اور اس کا مرکز کلو میں زمین کے اندر 10کلومیٹر کی گہرائی میں تھا۔انہوں نے کہا کہ بڑے زلزلے کے بعد صبح 7بج کر 5منٹ پر 4.3شدت کا اور نو بجے 4.2شدت کے دو جھٹکے بھی درج کئے گئے۔رام پور کے سب ڈویژنل مجسٹریٹ نشانت ٹھاکر نے بتایا کہ جان و مال کے نقصان کی ابھی کوئی خبر نہیں ہے۔تعلیمی اداروں اور اسکولوں کو احتیاطی طور پر بند کر دیا گیا ہے۔انہوں نے بتایا کہ اپنے گھر واپس جانے سے خوفزدہ لوگوں کو کھلے میں رہنے کے لیے خیمے مہیا کرائے گئے ہیں اور ایک اسکول کے احاطے میں ایک بڑے درخت کو گرا دیا گیا ہے جو خطرہ پیدا کر رہا تھا۔حکام نے کہا کہ کلو کے انی علاقے، کنگل اور کمارسین کی کچھ پرانی عمارتوں میں دراڑیں آ گئی ہیں۔رام پور اور کلو کے اندرونی علاقوں سے پہاڑ سے چٹان گرنے کی خبریں آئی ہیں۔جھٹکوں کے بعد لوگوں نے دفتر جانے سے گریز کیا ، زلزلے کے جھٹکے شملہ، سولن، چوپال، اور سرمور ضلع کے مختلف حصوں میں محسوس کئے گئے۔جھٹکوں نے زمین کے کھسکنے کا خطرہ بڑھا دیا ہے۔کلو اور شملہ میں ضلع انتظامیہ کے حکام نے بتایا کہ فی الحال جان و مال کے نقصان کی کوئی خبر نہیں ہے۔