باغی جے ڈی ایس اراکین کو کمار سوامی کی وارننگ، میرے خاندانی معاملات میں مداخلت کریں گے تونتائج سخت ہوں گے: کمار سوامی
بنگلورو:11/ جولائی(ایس اونیوز) سابق وزیر اعلیٰ اور ریاستی جنتادل (ایس) صدر ایچ ڈی کمار سوامی نے آج اپنی پارٹی کے باغی اراکین اسمبلی کو متنبہ کیا کہ ان کے یا ان کے خاندان کے ساتھ اگر کسی نے الجھنے کی کوشش کی تو نتیجہ ٹھیک نہیں ہوگا۔ اخباری نمائندوں سے بات چیت کرتے ہوئے کمار سوامی نے جنتادل (ایس) کے باغی اراکین کی طرف سے پارٹی کے لیڈر اور کمار سوامی کے بھائی ایچ ڈی ریونا کے فرزند پرجول ریونا کے بیان پر ردعمل ظاہر کئے جانے اور جنتادل (ایس) میں کمار سوامی کی وجہ سے سوٹ کیس تہذیب عام ہوجانے کی تصدیق کئے جانے پر سخت برہمی کا اظہار کرتے ہوئے کمار سوامی نے کہاکہ ان کے اور ان کے خاندان کے معاملات میں اگر کسی نے دخل دینے کی کوشش کی یا ریونا یا پرجول ریونا کے معاملے کو اچھالنا چاہا تو اس کی قیمت بہت بھاری چکانی پڑے گی۔ اس الزام پر کہ کمار سوامی نے پچھلے راجیہ سبھا انتخابات میں پارٹی امیدوار بنانے کیلئے صنعت کار بی ایم فاروق سے بھاری رقم لی ہے، تردید کرتے ہوئے کہاکہ اس سلسلے میں اگر دریافت کرنا ہے تو فاروق سے ہی دریافت کیا جائے کہ انہوں نے کتنی رقم دے کر راجیہ سبھا سیٹ حاصل کی ہے۔ انہوں نے کہاکہ فاروق کو انہوں نے پارٹی میں لے کر ایک وفادار کارکن کی طرح استعمال کیا ہے، پارٹی سے دغا کرکے باہر نکلنے والے جیب کتروں کی طرح وہ گندی سیاست کرنا نہیں جانتے۔ کمار سوامی نے کہاکہ جنتادل (ایس) باغیوں نے ان سے انتخابات کیلئے دس کروڑ روپیوں کی رقم طلب کی تھی، تاکہ راجیہ سبھا میں فاروق کے حق میں ووٹ دے سکیں، اتنی رقم کہاں سے دے سکتے ہیں، اگر اتنا دینا ہے توہمیں خود نوٹ چھاپنے پڑیں گے۔ کمار سوامی نے باغی اراکین کو چیلنج کیا کہ ان کے خلاف اگر ثبوت ہیں تو منظر عام پر لائیں وہ کسی بھی سطح کی جانچ کا سامنا کرنے تیار ہیں۔ انہوں نے کہاکہ باغی اراکین میں سے کچھ لوگ وزیر اعلیٰ سدرامیا کے بہت قریب ہیں، وہ لوگ اپنی جرأت کا مظاہرہ کرتے ہوئے اس معاملے کی جانچ سی بی آئی کو دیں اگر سی بی آئی پر اعتبار نہیں تو امریکہ کے صدر ڈونالڈ ٹرمپ کو دیں، وہ ان لوگوں سے ڈرنے والے نہیں ہیں۔