ہندوستان ہی نہیں دنیا میں کہیں بھی سب سے قیمتی کھلاڑی ہیں آشون:واٹمور
چنئی،18جنوری(ایس اونیوز/آئی این ایس انڈیا)دنیا کے عظیم کرکٹ کوچز میں سے ایک ڈیو واٹمور نے کہا آئندہ دورہ ہند آسٹریلیا کیلئے آسان نہیں ہوگا۔انہوں نے ہندوستانی آف اسپنر آر اشون کی بھی جم کر تعریف کی۔سری لنکا کو 1996میں عالمی کپ دلانے والے کوچ واٹمور چنئی میں واقع انٹرنیشنل کرکٹ اکیڈیمی آف ایکسیلیس کے ڈائریکٹر ہیں۔انہوں نے کہا کہ آسٹریلیا کے ساتھ اس کی بہترین ٹی 20ٹیم ہے۔ہندوستانی دورہ سخت امتحان ہوتا ہے خاص طور پر اس وقت جبکہ ٹیم شاندار فارم میں ہے۔ہندوستان کے پاس بہترین ٹیسٹ ٹیم ہے،نیا کپتان ہے اور ٹیم میں زبردست تال میل ہے۔آسٹریلیا کے لیے یہ دورہ آسان نہیں ہوگا۔آشون کے بارے میں انہوں نے کہا کہ وہ دنیا کے سب سے زیادہ قیمتی کھلاڑیوں میں سے ہے،صرف گیند سے نہیں بلکہ بلے سے بھی وہ مددگار ہے اور چھٹے نمبر پر سنچری بنا سکتا ہے،وہ تمل ناڈو سے ہے اور انجینئر ہے،اس کے جیسا کھلاڑی ٹیم میں ہونا کسی ورثہ سے کم نہیں،متھیا مرلی دھرن عالمی معیارکا بالر تھا لیکن وہ اشون کی طرح بیٹنگ نہیں کر پاتا تھا۔انہوں نے ہندوستانی تیز گیند بازوں کے بارے میں کہا کہ پہلے ہندوستان کے تیز گیند باز گیند کو خراب کرکے اسپنروں کو سونپتے تھے،اب اگرچہ کئی بہترین تیز رفتار اور سوئنگ بولر ہے خاص طور پر بھونیشور کمار اور دیگر۔
