بھٹکل:11/ستمبر(ایس اؤ نیوز) بھٹکل میں چوہے کے بخار میں مبتلا ہوکر دو لوگوں کی موت سمیت بعض لوگوں کے اسپتال میں داخل کئے جانے کی اطلاعات کے بعد منگل کو ضلعی ڈاکٹروں کی ہدایات پر کاروار سے ڈاکٹر وجئے کی قیادت میں ماہرین کی ایک ٹیم بھٹکل پہنچی اور متعلقہ گھروں میں پہنچ کر علاقہ کا جائزہ لیتے ہوئے ضروری معلومات اور جانکاری حاصل کیں۔
حالیہ دنوں میں چوہے کی بخار سے ہونے والی مشتبہ ہلاکتوں کولےکر تعلقہ کے مٹھلی اور منکولی کے مکینوں سے ملاقات کرتے ہوئے مہلوکین کے روزمرہ زندگی کے متعلق جانکاری حاصل کی۔ڈاکٹروں کی اس ٹیم نے علاقہ کا دورہ کرتے ہوئے کئی ایک مکینوں کو ہدایات دیں کہ وہ کنوئوں میں جراثیم مار پاوڈر چھڑکیں، اسی طرح علاقہ میں اُن مریضوں کو جانچ کرنے سرکاری اسپتال روانہ کیا، جو بخار میں مبتلا پائے گئے۔ انہوں نے عوام الناس سے صاف صفائی پر دھیان دینے کی تاکید کی۔