بھٹکل میں چوہے کا بخار پھیلنے کا خدشہ؛ مشتبہ بخار سے ایک کی موت؛ دو منی پال اسپتال میں داخل
بھٹکل یکم ستمبر (ایس او نیوز) بھٹکل میں جان لیوا چوہے کا بخار پھیلنے کا خدشہ ظاہر کیا جاہر ہے اور بتایاجارہا ہے کہ اس بخار کی زد میں آکر ایک شخص کی موت واقع ہوگئی ہے جبکہ دیگر دو مریض منی پال اسپتال میں زیرعلاج ہیں۔
ذرائع کے مطابق بھٹکل کے شہری میونسپل حدود میں یہ بخار تیزی سے پھیل رہا ہے اور اب تک تین لوگوں کے اس بخار میں مبتلا ہونے کی خبر ہے جس میں ایک کی موت ہوچکی ہے۔
خبر ملی ہے کہ اس تعلق سے ضلع کے میڈیکل آفسر کو منی پال اسپتال سے رپورٹ روانہ کی جاچکی ہے ۔ مگر ساحل آن لائن سے فون پر گفتگو کرتے ہوئے ضلع کے میڈیکل آفسر اشوک کمار نے بتایا کہ ابھی اُنہیں رپورٹ موصول نہیں ہوئی ہے، رپورٹ موصول ہونے کے بعد ہی وہ اگلی کاروائی کرسکتے ہیں۔
خیال رہے کہ یہ بخار چوہوں کے کاٹنے سے ہوتا ہے، جس کے بعد یہ بخار دوسروں تک پھیلتا جاتا ہے۔
پڑوسی ریاست کیرالہ میں سیلاب کے بعد چوہوں کا بخار تیزی کے ساتھ پھیلنے کی اطلاعات مل رہی تھی، مگر اب بھٹکل میں تین مریضوں کے اس بخار میں مبتلا ہونے کی اطلاع ملنے کے بعد اس کے تدارک کی طرف توجہ دینا بے حد ضروری ہے۔