ہوناور میں ایک کالج طالبہ کی عصمت دری کی کوشش؛ عوام نے نوجوان کو پکڑ کر کیا پولس کے حوالے
بھٹکل 16/ جنوری (ایس او نیوز) یہاں سے قریب 38 کلو میٹر دور ہوناور میں پولس نے ایک کالج طالبہ کی عصمت دری کرنے کی کوشش کے الزام میں ایک 26 سالہ نوجوان کو گرفتار کرلیا ہے جس کی شناخت ہوناور کے النکّی کے رہنے والے گرو راما گوڈا کی حیثیت سے کی گئی ہے۔
ہوناور کے عوام نے بتایا کہ کالج کی ایک 16 سالہ طالبہ کلاسس ختم کرکے دوپہر قریب 3:30 بجے اپنے گھر لوٹ رہی تھی کہ بند ر روڈ پر گرو راما گوڈا نامی ایک نوجوان نے اس کے بدن پر ہاتھ ڈال کر اُس کے ساتھ غلط حرکتیں کرنے کی کوشش کی، جس پر لڑکی نے مدد کے لئے چلانا شروع کردیا۔ لڑکی کی آواز پر لوگ جمع ہوگئے اور لوگوں نے گرو راما گوڈا کو رنگے ہاتھ پکڑ کر اُس کی اچھی خبر لیتے ہوئے ہوناور پولس کے حوالے کردیا۔
پولس نے گرو راما گوڈا کو گرفتار کرلیا ہے اور نابالغ لڑکی کی طرف سے دی گئی شکایت پر کاروائی کرتے ہوئے اُس پر پوکسو ( پروٹیکشن آف چلڈرن فروم سیکسول آفینس ایکٹ) کے تحت معاملہ درج کرلیا ہے۔
