انکولہ میں طالبہ کے ساتھ عصمت ریزی کی کوشش؟
انکولہ 4؍اگست (ایس او نیوز) تعلقہ کے کوٹیواڈا علاقے میں ایک طالبہ کے ساتھ عصمت دری کی کوشش کا واقعہ اس وقت سامنے آیا جب کے ایل ای ہائی اسکول کی مذکورہ طالبہ کوٹیواڈا کے مندر والے راستے پر تنہا اپنے گھر جارہی تھی۔
موصولہ رپورٹ کے مطابق مندر کے کمپاؤنڈ میں چھپ کر بیٹھا ہوا ایک اجنبی شخص طالبہ پر جھپٹ پڑا۔ اس سے خوفزدہ ہوکر طالبہ نے شور مچانا شروع کیا تو وہ شخص وہاں سے فرار ہوگیا۔جیسے ہی اس واقعے کی خبر عام ہوئی تو لوگوں کاہجوم مندر کے پاس جمع ہوگیا۔ سرکل پولیس انسپکٹر بی پرمود کمار نے جائے واردت پر پہنچ کر معائنہ کیا اور متاثرہ لڑکی کو تسلی دیتے ہوئے واقعے کے تعلق سے تفصیلات معلوم کیں۔
ملزم کو گرفتار کرنے کے لئے پولیس نے جال بچھادیا ہے۔ مقامی عوام کا کہنا ہے کہ کوٹیواڈا اور اس کے اطراف گانجہ فروشی اور دیگر غیر قانونی سرگرمیاں بہت زیادہ بڑھ گئی ہیں اس لئے پولیس کو اس سلسلے میں سخت اقدامات کرنے چاہئیں۔