نئی دہلی ،16؍ اکتوبر (ایس او نیوز؍آئی این ایس انڈیا)کانگریس نے پٹرول۔ڈیزل کی قیمتوں میں اضافہ اور ہندوستانی سرحد کے اندر چینی فوجیوں کے مبینہ تجاوز کو لے کر منگل کو وزیر اعظم نریندر مودی پر نشانہ لگایا اور دعوی کیا کہ اب اس حکومت کی الٹی گنتی شروع ہو چکی ہے۔پارٹی کے مرکزی ترجمان رندیپ سرجیوالا نے ٹویٹ کر کہاکہ پٹرول، ڈیزل اور رسوئی گیس کی ہر روز بڑھتی قیمتوں سے عوام پریشان ہے۔مہنگائی عروج پر ہے، بچت مسلسل گھٹتی جارہی ہے، عوام پریشان ہے، ہر طبقے کو نقصان پہنچاہے۔انہوں نے الزام لگایا کہ اچھے دن کا خواب دکھا، مودی جی نے عوام کو ٹھگا۔7 ماہ کی بات ہے۔الٹی گنتی شروع ہو چکی ہے۔اروناچل پردیش میں چینی فوجیوں کے خیمے گاڑنے سے متعلق خبروں کا حوالہ دیتے ہوئے سرجیوالا نے کہا کہ اروناچل میں چینی فوج نے خیمے نصب کیے، لداخ میں ہیلی کاپٹر گھسا۔مودی جی نے 2014 میں اسے انتخابی ایشو بنایا تھا، وعدہ کیا تھا لال آنکھ دکھائیں گے، پچھلی حکومتوں کی تنقید کی تھی۔اب خاموش تماشائی بنے 53 مہینوں سے اقتدار پر قابض ہیں۔ایک لفظ بھی نہیں نکلا منہ سے؟ 56 انچ کا کیا ہوا؟