بھٹکل:پولس کے نہایت سخت بندوبست کے درمیان رام چندر نائک کا انتم سنسکار: ڈی سی،ایس پی اور کئی مسلمانوں کی شرکت
بھٹکل:16/ستمبر (ایس اؤنیوز)بلدیہ دکانوں کی تحویلی کارروائی کے دوران مشتعل ہوکر خود سوزی کی کوشش کرنے کے بعد منی پال اسپتال میں علاج کارگر نہ ہونے سے ہلا ک ہونے والے آسارکیری کے مکین رام چندر ناگپا نائک کا سیکڑوں پولس سکیورٹی انتظامات کے درمیان گھروالوں ، رشتہ داروں سمیت کئی مسلمانوں کی موجودگی میں بندرروڈ کے شمشان میں اس کی آخری رسومات ادا کی گئیں۔
خیال رہے کہ رام چندرا کی خود سوزی سے اس کے جسم کا زائد حصہ جل گیا تھا جس کی وجہ سے منی اسپتال کے ڈاکٹروں نے باحیات رہنے کے متعلق کوئی بھروسہ نہیں دے رہے تھے ، البتہ وہ یہی کہ رہے تھےکہ تین چار دنوں میں علاج کا اگر اثر ہوتاہے تو اگلے دنوں میں صحت یابی کی امید ہے ، جمعہ کی دیر رات ہی رام چندر نائک کی سانس رک جانے سے ڈاکٹروں کی تمام کوششیں ناکام ہوگئیں۔ صبح 15-08کوبھٹکل کے آسارکیری میں واقع اس کے گھر نعش پہنچی ۔
اس موقع پر گھرپرجمع لوگوں نے اپنی برہمی کا اظہار کرتے ہوئے ڈپٹی کمشنر سے مطالبہ کیا کہ مہلوک کے گھر پہنچ کر خاندان والوں کو معاوضہ ادا کیا جائے، ورنہ نعش کو بلدیہ کے سامنے لے جاکر احتجاج کیا جائے گا۔
عوام نے بھی اس موقع پر انصاف کا مطالبہ کرتے ہوئے ڈپٹی کمشنر ایس ایس نکولس سے کہا کہ دکانوں سے بے دخل کرنے کے نتیجے میں دکاندار سڑکوں پر آگئے ہیں۔
حالات کی کشیدگی کو دیکھتے ہوئے ڈپٹی کمشنر ایس ایس نکول مہلوک کے گھر پہنچ کر گھر والوں کے ساتھ تعزیت کی اور ایک ہفتہ کے اندر معاوضہ کے لئے حکومت کو رپورٹ ارسال کرنے کا تیقن دیا۔
صبح قریب-10بجے لوگ نعش کو لے کر گھرسے نکلے ، روٹ کو لے کر پولس اور لوگوں کے درمیان کچھ دیر کے لئے دھکے بازی ہوئی اور کچھ لوگوں نے پولس کو دھکہ دیتے ہوئے آگے بڑھنا شروع کیا۔ پولس کو بھی مجبوری میں اپنا فیصلہ بدلتے ہوئے عوام کے ساتھ چلنا پڑا ۔
لاش کو آسارکیری سے سلطان اسٹریٹ والے راستے سے باہر نکالتے ہوئے اولڈ بس اسٹانڈسے ہوتے ہوئے بندرروڈ پر واقع شمشان گھاٹ لے جایا گیا جہاں مذہبی رسومات کے ساتھ انتم سنسکار کیا گیا ۔ اس موقع پر رکن اسمبلی منکال وئیدیا، تعلقہ پنچایت صدر ایشور نائک، ضلع پنچایت ممبر البرٹ ڈیکوستھا، نچل مکی مندر انتظامیہ کے صدر ایم آر نائک، ڈی بی نائک، آٹو یونین کے صدر وینکٹیش نائک، بلاک کانگریس صدر وٹھل نائک، بی جے پی صدر راجیش نائک، بی جے پی لیڈران گوند نائک، کرشنا نائک، سنیل بی نائک، دنیش نائک، روی نائک سمیت کئی مسلم لوگ بھی موجود تھے۔
منی پال اسپتال سے بھٹکل لانے سے لے کر انتم سنسکار ہونے تک شہر بھر میں پولس کا نہایت سخت بندوبست کیا گیا تھا۔ ضلع پولس ایس پی ونایک پاٹل ، ایڈیشنل ایس پی ونایک بیاکوڑ، ڈی وائی ایس پی پرمود راؤ، ڈی وائی ایس پی شیوکمار، سی پی آئی سریش نایک، سی پی آئی گوپال کرشنا نایک، سی پی آئی شری کانت وغیرہ پولس سکیورٹی کی نگرانی کررہے تھے۔