منگلورو21؍نومبر (ایس او نیوز) رام مندر کی تعمیر کے لئے مرکزی حکومت سے قانون بنانے کا مطالبہ کرتے ہوئے 25نومبر کو وشوا ہندوپریشد کی جانب سے نہرو میدان میں ایک میگا کنوینشن منعقد کیا جائے گا۔
وی ایچ پی کے سکریٹری شرن پمپ ویل نے اخباری کانفرنس سے خطاب کرتے ہوئے کہا کہ:’’ نہرو میدان میں جلسے سے قبل امبیڈکر( جیوتی) سرکل سے ایک زبردست ریالی نکالی جائے گی۔اس جلسے میں ضلع جنوبی کینرا سے تقریباً50ہزار رام بھکتوں کی شرکت متوقع ہے۔جلوس کے شرکاء رام کی جھانکی کے ساتھ بھجن گاتے ہوئے چلیں گے۔جلسے میں بہت سارے مذہنی رہنما اور سنت شامل ہونگے اور بجرنگ دل کے نیشنل کنوینرسوہن سنگھ سولنکی کا خطاب عام ہوگا۔‘‘
پریس کانفرنس کے دوران کیرالہ کے سبریملا مندر کے موضوع پر بولتے ہوئے وی ایچ پی کے ڈسٹرکٹ صدر جگدیش شیونا نے مرکزی حکومت سے مطالبہ کیا کیرالہ کے وزیراعلیٰ پینارائی وجیان کی حکومت کو برخاست کردیا جائے اور مرکزی حکومت مداخلت کرتے ہوئے مندر سے متعلق مسئلے کو حل کرے۔
وشواہندوپریشد اور بجرنگ دل کے لیڈران بوجنگا کولال، پروین کوتھار اور شیوانند مینڈون وغیرہ پریس کانفرنس کے دوران موجود تھے۔