راجیواتسوا اعزازات کی تقریب پھر ملتوی ہونے کاامکان
بنگلورو، 13؍نومبر(ایس او نیوز) ریاستی حکومت کی طرف سے امسال راجیواتسوا اعزازات کی تقسیم کے پروگرام کو ایک بار پھر ملتوی کردئے جانے کے واضح اشارے دئے جارہے ہیں ۔حکومت کی طرف سے مختلف شعبہ ہائے حیات میں نمایاں خدمات انجام دینے والی 63شخصیتوں کو راجیواتسوا کے موقع پر اعزازات سے نوازا جانا تھا، لیکن پانچ حلقوں کے ضمنی انتخابات کے لئے ضابطہ لاگو ہونے کے سبب اس پروگرام کو نہ صرف موخر کیا گیا بلکہ اس سے پہلے اعزاز یافتگان کے انتحاب کا عمل بھی انجام تک نہیں پہنچایا گیا۔یہ طے کیا گیا تھا کہ 6 نومبر کو پانچ حلقوں کے نتائج کے بعد راجیواتسوا اعزازات کی تقریب منعقدکی جائے گی، لیکن 10نومبر کو ٹیپو سلطان جینتی تقریبات اور اسی دوران وزیراعلیٰ کمار سوامی کی صحت میں خرابی اور اب مرکزی وزیر اننت کمار کی ناگہانی موت اس تقریب کے درمیان حائل ہوگئے۔ ریاستی حکومت کی طرف سے اننت کمار کے لئے سہ روزہ سوگ کا جو اعلان کیا گیا تھا وہ کل بھی جاری رہے گا۔ اس وجہ سے کل بیدر میں شروع ہونے والے ریاستی کوآپریٹیو ہفتے کی تقریبات کو بھی 15نومبر کو ٹال دیا گیا ہے، اس پروگرام میں شرکت کے لئے کمار سوامی بھی بیدر کے دورے پر جارہے ہیں اس لئے یہ امکان کم نظر آرہا ہے کہ 16نومبر سے پہلے راجیو اتسوا اعزات طے کرنے کے لئے کمیٹی کا اجلاس ہوگا اور نہ ہی اس سے قبل راجیواتسوا اعزاز کے جلسے کی تاریخ کا تعین ہوپائے گا۔