بھٹکل 25/اکتوبر (ایس او نیوز) یکم نومبر کو سرکاری سطح پربھٹکل میں شاندار پیمانے پر راجیہ اتسوا منانے کا فیصلہ کیا گیا ہے۔ مختلف سرکاری محکمہ جات اور سماجی و ثقافتی تنظیموں کے ساتھ تحصیلدار دفتر میں منعقدہ میٹنگ میں اس ضمن میں کئی تجاویز منظورکی گئی ہیں۔

 بھٹکل تحصیلدار کی طرف سے جاری کی گئی تفصیلات کے مطابق کنڑا راجیہ اتسوا کا جلوس نیو انگلش اسکول سے شروع ہوگا اور شمس الدین سرکل سے ہوتا ہو ا تعلقہ اسٹیڈیم(نوائط کالونی) پہنچ کر جلسہ میں تبدیل ہوگا۔اس جلوس میں بھونیشوری دیوی کی تصویر کے علاوہ دیگر تصاویر کے ساتھ موٹر گاڑیاں، اسکول اورکالجوں کے طلباء اور اساتذہ کا شامل رہنا لازمی ہوگا۔تعلقہ سطح کے تمام سرکاری افسران اور اسٹاف، عوامی نمائندے، اداروں اور تنظیموں کے ذمہ داران کو صبح 7.30بجے نیو انگلش اسکول کے میدان میں جمع ہونا ہے، جہاں پر8بجے بھونیشوری دیوی کی پوجا کے بعدجلوس کا آغاز ہوگا۔جس میں بھکتی گیت بجائے جائیں گے اور آنند آشرم کانوینٹ کا بینڈ باجہ شامل رہے گا۔

جلوس کے ساتھ پولیس کا پورا بندوبست رہے گا اور جلسہ ختم ہونے تک کسی بھی میڈیکل ایمرجنسی کو سنبھالنے کے لئے طبی امداد کے ساتھ ایمبولینس کا بھی انتظام رہے گا۔جلسہ گاہ میں تقاریر کے علاوہ اسکولی طلباء کی جانب سے چھوٹے چھوٹے ثقافتی پروگرام بھی پیش کیے جائیں گے۔اس موقع پر سماجی، ادبی اور ثقافتی زندگی میں اپنی خدمات سے نام پانے والوں کی عزت افزائی بھی کی جائے گی۔