نئی دہلی، 23؍جولائی(ایس اونیوز/آئی این ایس انڈیا )کانگریس نے کشمیر کی موجودہ صورت حال پر سخت تشویش کا اظہار کرتے ہوئے آج امید ظاہر کی کہ وزیر داخلہ راج ناتھ سنگھ وادی کے اپنے دورے کے دوران اعتماد سازی کے اقدام کے ساتھ ہی یہ بھی اعلان کریں گے کہ مظاہرین کے خلاف اب پیلیٹ گن کا استعمال نہیں کیا جائے گا۔کانگریس کے سینئر لیڈر غلام نبی آزاد نے وزیر اعظم نریندر مودی پر بھی نشانہ سادھا اور الزام لگایا کہ ان کو اور ان کی حکومت کو کشمیر کے لوگوں کی فکر نہیں ہے کیونکہ جب معاملے پر بحث ہو رہی تھی ،تو وہ لوک سبھا اور راجیہ سبھا دونوں سے غیرحاضر تھے۔انہوں نے کہاکہ اب 16دنوں بعد وزیر داخلہ کشمیر گئے ہیں۔مجھے پورا یقین ہے کہ وہ کشمیر کے لوگوں کے سامنے اعلان کریں گے کہ اب سے کشمیر میں پیلیٹ گن کا استعمال نہیں کیا جائے گا۔انہوں نے کہاکہ میں یہ بھی امید کرتا ہوں کہ وزیر داخلہ اعتماد سازی کے اقدامات کی شروعات کریں گے تاکہ کشمیر کے لوگ ایک بار پھر مرکز اور ریاستی حکومتوں پر اعتماد کرسکے ۔آزاد نے کہا کہ کشمیر کے موجود ہ حالات سخت تشویش کا باعث تھے جو حزب المجاہدین کے لیڈر برہان وانی کی موت کے بعد ہوئے تشدد سے متاثر تھے ۔آزاد نے وزیر اعظم پر نشانہ لگاتے ہوئے کہاکہ مسئلہ کشمیر پر راجیہ سبھا اور لوک سبھا میں بحث ہوئی، لیکن انہوں نے ان میں سے کسی میں بھی حصہ نہیں لیا،اس سے یہ ظاہر ہو تا ہے کہ کشمیر ی عوام کی حکومت اور وزیر اعظم کو کتنی فکر ہے۔کشمیر کے چار اضلاع اور سری نگر کے مختلف حصوں سے صورت حال میں بہتری کے پیش نظر کرفیو ہٹا لیا گیا لیکن وادی کے دیگر علاقوں میں احتیاطی طور پر کرفیو کا سلسلہ ابھی بھی جاری ہے ۔9 ؍جولائی سے سیکورٹی فورسز اور مظاہرین کے درمیان ہوئی جھڑپوں میں اب تک 45افراد ہلاک ہو گئے ہیں جبکہ 3400سے زائد زخمی ہوئے ہیں جن میں سے کئی لوگ اپنی بینائی سے ہاتھ دھوبیٹھے ہیں ۔