الور میں پہلو خان کے بعد ایک اور قتل واقعہ، گایوں کی اسمگلنک کے شک میں پیٹ پیٹ کر لی جان
الور،21؍جولائی (ایس او نیوز؍ایجنسی) راجستھان کے الور واقع رام گڑھ علاقہ میں ہفتہ کو گایوں کی اسمگلنگ کے شک میں بھیڑ نے ایک شخص کا پیٹ پیٹ کر قتل کر دیا۔ مقتول کی شناخت اکبر خان کے طور پر ہوئی ہے۔بتایا جا رہا ہے کہ وہ ہریانہ میں واقع اپنے کول گاوں سے دو گائیں رام گڑھ کے لالونڈی لے کر جا رہا تھا تبھی لوگوں نے اس پر حملہ کر دیا۔ مقتول کی لاش ہریانہ کے ایک سرکاری اسپتال میں رکھی گئی ہے جبکہ پولیس معاملہ کی جانچ کر رہی ہے۔
خیال رہے کہ موب لنچنگ پر الگ سے قانون بنائے جانے سے متعلق سپریم کورٹ کے حکمنامہ کے محض چار دن بعد لنچنگ کا یہ واقعہ پیش آیا ہے۔ سپریم کورٹ نے گئوركشا کے نام پر ہونے والے پرتشدد واقعات کی روک تھام کے لئے الگ سے قانون بنانے کی مرکزی حکومت کو ہدایت دی ہے۔ چیف جسٹس دیپک مشرا کی صدارت والی بنچ نے منگل کو گئوركشا کے نام پر تشدد کے بڑھتے واقعات پر تشویش ظاہر کرتے ہوئے کہا تھا کہ کوئی بھی شہری اپنے ہاتھ میں قانون نہیں لے سکتا۔ کورٹ نے خود ساختہ گئوركشكو ں کو روکنے اور متعلقہ واقعات کی روک تھام کے لئے کچھ ہدایات بھی جاری کئے اور ان پر عمل کرنے کے لئے چار ہفتے کا وقت دیا ہے۔
بتا دیں کہ پچھلے سال 50 سالہ پہلو خان کی بھی ان کے کنبہ کے دیگر ارکان کے ساتھ راجستھان کے الور میں قومی شاہراہ 8 پر نام نہاد گئو رکشکوں نے بری طرح پٹائی کر دی تھی۔ سنگین طور پر زخمی پہلو خان کو ضلع کے کیلاش اسپتال میں بھرتی کرایا گیا تھا جہاں وہ زخموں کی تاب نہ لا کر چل بسے تھے۔