ٹکٹ نہ ملنے سے ناراض کانگریس جنرل سکریٹری جیوتی کھنڈیلوال نے دیا استعفیٰ
جے پور،16؍ نومبر (ایس او نیوز؍آئی این ایس انڈیا) راجستھان میں کانگریس کے اسمبلی انتخابات میں امیدواروں کی پہلی فہرست جاری ہونے کے بعد ٹکٹ نہ ملنے سے ناراض ہو کر جنرل سکریٹری جیوتی کھنڈیلوال نے استعفی دے دیا اور کئی امیدواروں کے حامیوں نے پارٹی اعلی کمان کے خلاف نعرے بازی کرکے احتجاج کیا۔احتجاج کے پیش نظر ریاستی کانگریسی دفتر میں سخت حفاظتی انتظامات کئے گئے ہیں۔سابق میئر جیوتی کھنڈیلوال نے جے پور کے کشن پول سے ٹکٹ مانگا تھا لیکن انہیں نہیں ملا۔ اس سے ناراض ہوکر انہوں نے پارٹی سے استعفیٰ دے دیا۔جے پور میں ودیادھرنگر سے ٹکٹ نہ ملنے پر وکرم سنگھ نے بھی آزاد امیدوار کے طور پر انتخاب لڑنے کا ارادہ کرلیا ہے۔ سابق ریاستی صدر بی ڈی کلا کو ٹکٹ نہ ملنے سے ناراض ہوکر حامیوں نے جم کر نعرے بازی کی۔ بیکانیر میں گزشتہ انتخابات میں امیدوار رہنے والے گوپال گہلوت نے بھی آزاد امیدوار کے طور پر الیکشن لڑنے کا اعلان کیا ہے۔کوٹہ جنوب میں راکھی گوتم کو امیدوار بنانے سے ناراض ہو کر شو?انت ندوانا اور پنکج مہتا کے حامیوں نے جم کر نعرے بازی کی اور ٹائر جلا کر احتجاج کیا۔ اجمیر جنوب سے سابق وزیر للت بھاٹی کو ٹکٹ نہ ملنے سے ناراض ہوکر انہوں نے آزاد امیدوار کے طور پر انتخاب لڑنے کا اعلان کیا ہے۔ کانگریس نے ان کے بھائی ہیمنت بھاٹی کو ٹکٹ دیا ہے۔