راجستھان میں ایمبولینس ملازمین کی ہڑتال، طبی خدمات متاثر
جے پور،21؍ مارچ (ایس او نیوز؍آئی این ایس انڈیا) تنخواہ بڑھانے کی مانگ کو لے کر راجستھان کے ایمبولینس ملازمین کی ہڑتال کے تیسرے دن تقریباً1500 ایمبولینس گاڑیوں کے رک جانے سے طبی خدمات متاثر ہوئی ہیں۔دارالحکومت جے پور میں ایمبولینس سروس کے ملازم اپنی 15نکاتی مطالبات کو لے کر پیر سے ہڑتال پر ہیں۔جے پور کے ایمبولینس ملازمین کی طرف سے شروع کی گئی اس ہڑتال میں پوری ریاست کے ایمبولینس ملازم شامل ہو گئے ہیں۔راجستھان ہنگامی ایمبولینس ملازم یونین کے صدر وریندر سنگھ نے بتایا کہ حکومت کے ساتھ منگل کو ہوئی مذاکرات ناکام رہی۔ ملازمین نے حکومت کی جانب سے تین فیصد کے اضافہ کی تجویز کو قبول نہیں کیا اور حکومت نے ملازمین کے دیگر مطالبات بھی نہیں مانا۔انہوں نے بتایا کہ ریاست کے بنیادی طبی مراکز اور کمیونٹی طبی مراکز پر 108 ایمبولینس خدمات کے لئے 730ایمبولینسوں، 104 ایمبولینس خدمات کے لئے 588 ایمبولینس اور بیس ایمبولینس خدمات کے لئے 200 ایمبولینس ملازم ہیں۔انہوں نے کہاکہ ہمیں تمام ملازمین کی حمایت حاصل ہے اور ہمارا احتجاج جاری رہے گا۔قابل ذکر ہے کہ حکومت نے گزشتہ 16مارچ کو ایک نوٹیفکیشن کے ذریعے 108ہنگامی خدمات، 104 زچگی ایکسپریس اور بیس ایمبولینس خدمات کو ریسما کے تحت ضروری خدمات کا اعلان کر دیا تھا۔ریاست کی تقریبا چھ ہزار ایمبولینس خدمات کے ملازم ہڑتال میں شامل ہیں۔سنگھ نے کہاکہ معاہدے کے مطابق 10فیصد اضافہ کی تجویز ہے اور ہم اس معاملے کو لمبی مدت سے اٹھا رہے ہیں لیکن اس پر کوئی سنوائی نہیں ہو رہی ہے۔