ریل یاتری ایپ بتائے گا کنفرم ٹکٹ ملنے کی تاریخ
نئی دہلی،12؍جولائی (ایس او نیوز؍ایجنسی) سفر سے متعلق معلومات فراہم کرنے والے ریل یاتری ایپ میں ایک نیا فیچر رش او میٹر جوڑا گیا ہے جس سے اب کنفرم ریل ٹکٹ ملنے کی تاریخ کا پتہ لگایا جاسکتا ہے۔
ریل یاتری ڈاٹ ان نے آج یہاں جار ی ایک بیان میں کہا کہ بکنگ کھلنے کے دو ہفتہ کے اندر پچاس فیصد ٹرینیں بھر جاتی ہیں ۔ رش و میٹر نامی یہ فیچر دستیاب ٹکٹوں کے فروخت کا قبل از وقت اندازہ لگاتا ہے ۔ پرانے ڈاٹا اور ڈاٹا کا تفصیلی تجزیہ کرکے طویل مسافت کی تمام ٹرینوں میں ٹکٹ بکنگ کی رفتار کا پیشگی اندازہ لگایا جاتا ہے۔
کمپنی کے سی ای او اور معاون بانی منیش راٹھی نے کہا کہ ریل یاتری ڈاٹ ان نے ہمیشہ ریل مسافروں کی پریشانیوں پر توجہ دی ہے اور ورزانہ لاکھوں مسافروں کو کنفرم ٹکٹ نہیں مل پاتے ہیں جو کہ نہایت تکلیف دہ بات ہے۔ یہ فیچر یہ بتائے گاکہ کب یا کتنے گھنٹوں یا دنوں کے اندر ٹکٹ بک کروانی چاہئے تاکہ مایوس نہ ہونا پڑے۔ ٹکٹ کے کنفرمیشن کا پیشگی اندازہ لگانے والے بہت سے ایپ ہیں لیکن ریل یاتری واحد ایپ ہے جو ٹرینوں میں ٹکٹ بکنگ کی رفتار بتائے گا اور مناسب وقت پر بکنگ کرنے میں مدد کر یگا۔
انہوں نے کہا کہ اس فیچر سے کنفرم ٹکٹ ملنے کا امکان بڑھ گا کیوں کہ مسافروں کو یہ پتہ ہوگا کہ ٹکٹ کب فروخت ہوں گے ۔ یہ مستقبل کے سفر کے لئے ٹکٹ خریدنے کا منصوبہ بنانے والے مسافروں کے لئے الارم کا کام کرے گا ۔ اس فیچر سے اسپکٹیلیٹو بکنگ کم ہوگی ۔ جس میں کچھ لوگ چند ماہ پہلے ٹکٹ خرید لیتے ہیں خواہ ان کے سفر کا پروگرام طے ہواہو یا نہیں۔