ریلوے قوانین میں کئی اہم تبدیلیاں،یکم جولائی سے تتکال ٹکٹ واپسی پرری فنڈملے گی 50فیصد رقم
بھوپال:20/مارچ(ایس او نیوز /آئی این ایس انڈیا)آئندہ جولائی سے ریلوے ریزرویشن کے قوانین میں ہو رہی تبدیلی کی وجہ سے اب تتکال ٹکٹ پر ری فنڈ میں 50فیصد رقم مل سکے گی۔واضح رہے کہ ابھی تک تتکال ٹکٹ پر ری فنڈ کی واپسی کی سہولت نہیں تھی، اب ری فنڈ سے کم از کم آدھے پیسے مسافروں کو ملنے لگیں گے، ان کے لیے یہ بڑی راحت کی بات کہی جا رہی ہے۔ریلوے بورڈ نے ری فنڈ میں راحت کے علاوہ کنفرم ٹکٹ دینے کی منصوبہ بندی پر بھی کام کرنے کی کوشش شروع کر دی ہے،اس کے لیے ہر ٹرین میں بھیڑ کے دوران اضافی بوگیاں لگانے کا کام کیا جا رہا ہے، ساتھ ہی ویٹنگ لسٹ کاچکر بھی ایک طرح سے ختم کرنے کے لیے پوری کوشش کی جا رہی ہیں۔ریلوے کی جانب سے چلائی جانے والی سوویدھا ٹرینوں میں مسافروں کو کنفرم ٹکٹ کی سہولت دی جائے گی۔یکم جولائی سے تتکال ٹکٹ کے قوانین میں تبدیلی کی جا رہی ہے، جس میں صبح 10سے 11بجے تک اے سی کوچ کے لیے ٹکٹ بک ہوں گے اور 11سے 12بجے تک سلیپر کوچ کے لیے بکنگ ہوگی۔غورطلب ہے کہ ریلوے میں ٹکٹ کے لیے ہمیشہ سے مارا ماری ہوتی ہے، ایسے میں یکم جولائی سے ٹرینوں میں کوچوں کی تعداد بڑھائی جائے گی۔بھیڑ بھاڑ والے دنوں میں ٹرین میں بہتر سہولیات دینے کے لیے متبادل ٹرین ایڈجسمنٹ سسٹم، سوویدھا ٹرین شروع کرنے اور اہم ٹرینوں کی ڈپلیکیٹ گاڑی چلانے کے منصوبے پر بھی کام کیا جا رہا ہے۔ٹرینوں میں ٹکٹ واپسی پر 50فیصد کرایہ کی واپسی ہوگی، ساتھ ہی اے سی 2پر 100روپے، اے سی 3پر 90روپے اور سلیپر پر 60روپے فی مسافر کاٹے جائیں گے۔ساتھ ہی پیپرلیس ٹکٹ کی سہولت بھی شر وع کی جارہی ہے جس کی وجہ سے موبائل پر ٹکٹ بھیج دیا جائے گا۔