انکولہ 27/اگست (ایس او نیوز)انکولہ تعلقہ کے ہارواڑ میں غیر قانونی طور پر ریت نکالنے اور اسے ہبلی اور دھارواڑ کی طرف روانہ کرنے کے دھندے میں ملوث مافیا کے ایک اڈے پرضلع ایس پی کی قیادت میں ایک پولیس ٹیم نے آدھی رات کو چھاپہ مار کر ایک لگژری کار، دو جے سی بی مشینیں اور ذخیرہ کی گئی لاکھوں روپے کی ریت ضبط کرلی ہے۔

اس غیر قانونی دھندے میں شامل دو اہم ملزم اپنی پرانی چال کے مطابق موقع سے فرار ہوگئے، اور پولیس ان کے ساتھ تعاون کرنے والے دو افراد کو حراست میں لینے میں کامیاب ہوگئی ہے۔گرفتار ملزموں کے نام جے سی بی ڈرائیور چندرکانت آنند گوڈااور منوہر کوُبال بتائے جاتے ہیں۔ غیر قانونی ریت کے اس کاروبار کے مفرور اہم ملزم کے نام اگسور گرام پنچایت رکن گوپال نائک عرف ہُنڈی گوپو اور راجیندرا پتو پیڈنیکر عرف راجہ پیڈنیکر بتائے جاتے ہیں۔ضبط کی گئی لگژری کار گوپال کی ملیکت بتائی جاتی ہے۔

خیال رہے کہ اس علاقے میں رات کا اندھیرا ہوتے ہی غیر قانونی ریت مافیا سرگرم ہوجاتا ہے جس سے مقامی لوگ بہت پریشان ہیں۔ اس بارے میں اخبارات میں خبریں شائع ہونے پر ضلع ڈپٹی کمشنر ایس ایس نکول نے عوام سے درخواست کی تھی کہ ایسی غیر قانونی سرگرمیوں کے بارے میں مصدقہ اطلاع ان تک پہنچائیں۔ لیکن عوام کا کہنا ہے پولیس کو اس غیر قانونی دھندے سے ہونے والی آمدنی اس پر روک لگانے میں آڑے آرہی ہے اور کھلے عام یہ کاروبار بغیر کسی رکاوٹ کے بڑی شان کے ساتھ چلایا جارہا تھا۔اس پہلو کو ذہن میں رکھتے ہوئے ضلع سپرنٹنڈنٹ آف پولیس کی قیادت میں ایک ٹیم نے رات کے وقت ایسے اڈے پراچانک دھاوا بول دیا۔اور ریت مافیا کے ایک گروہ پر ہاتھ ڈالنے میں کامیاب ہوگئی۔ڈسٹرکٹ سیشن کورٹ میں شکایت درج کی گئی ہے۔ اور انکولہ پولیس اسٹیشن میں معاملہ درج کرنے کے بعد بقیہ مفرور ملزموں کی تلاش جاری ہے۔