کرناٹک میں بھی 10فروری سے راہل گاندھی کا دورہ
نئی دہلی،22؍جنوری (ایس او نیوز؍آئی این ایس انڈیا)گجرات میں نوسرجن یاتا کی بھاری کامیابی کو دیکھتے ہوئے راہل گاندھی نے کرناٹک کی عوام کے درمیان جانے کے لئے بس سے دورہ کرنے کی منصوبہ بندی کی ہے۔کانگریس کے صدرر اہل گاندھی 10فروری سے بلاری کے ہوسیٹ سے ریاستی بس یاتراشروع کریں گے۔اپنے خاص بس میں راہل گاندھی ریاست کے اپنے دورے کے پہلے مرحلے میں تین سے چار دنوں کادورہ کریں گے۔کانگریس کے کئی سینئر لیڈروں نے کہا کہ گجرات میں راہل گاندھی کی گجرات کی نوسرجن یاترا کافی کامیاب رہی ہے، اسی وجہ سے کرناٹک سمیت کئی ریاستوں کے کانگریس لیڈر ایسی ہی یاترا شروع کرنے کا مطالبہ کرتے رہے ہیں۔
غور طلب ہے کہ کرناٹک میں اگلے چند مہینوں میں اسمبلی انتخابات ہونے والے ہیں۔کرناٹک کانگریس نے ریاستی انتخابات کے لئے تیاری کے لئے ریاست کو چار زون میں تقسیم کیا ہے۔کرناٹک کانگریس کے کارگزار صدر دنیش گڈوراؤ نے کہا کہ ریاست میں بس یاترا کے آغاز سے پہلے راہل گاندھی ہوسپیٹ میں ایک بڑے جلسہ عام سے خطاب کریں گے۔
راؤ نے کہا کہ راہل جی ہماری انتخابی مہم کو ہاسپیٹ سے شروع کریں گے۔سی ایم سدارمیا ملکاارجن کھڑگے جیسے کئی سینئر رہنماؤں کے ساتھ جلسے سے خطاب کرنے کے بعد پہلے زون میں راہل گاندھی بس سے دورہ کریں گے۔لوگوں کوجوڑنے کے لئے بس کا سفر بہترین طریقہ ہے۔پارٹی ذرائع کے مطابق ان کے سفر کے دوران راہل گاندھی چھوٹی جن سبھائیں،نکڑسبھائیں کریں گے اور راستے میں آنے والے اہم مقامات کا بھی دورہ کریں گے۔
راؤ نے کہا کہ اس پورے سفر کی تفصیلی تفصیلات ابھی تیار کی جا رہی ہیں،ہم نے صرف ہاسپیٹ کے دورے کو حتمی شکل دی ہے، جہاں یہ یاترا شروع ہوگی اور 3سے 4لاکھ لوگوں کو جمع کیا جائے گا۔کرناٹک کانگریس نے بھی انتخاب میں گجرات وکاس ماڈل سے کرناٹک وکاس ماڈل کا موازنہ کرنے کی منصوبہ بندی کی ہے۔