بنگلورو،11؍ستمبر(ایس او نیوز)  سابق وزیر اعلیٰ و بی جے پی کے ریاستی صدر بی ایس ایڈی یورپا نے آج دعویٰ کیا ہے کہ وزیراعلیٰ سدارامیا کے مختلف گھپلوں اور دھاندلیوں سے متعلق دستاویزات ان کے پاس موجود ہیں۔ اگلے چار پانچ دنوں میں ان دستاویزات کو منظر عام پر لایا جائے گا۔ انہوں نے کہاکہ وزیراعلیٰ اپنے آپ کو بہت دیانتدار کہتے ہیں وہ کتنے دیانتدار ہیں دستاویزات جاری کئے جانے کے بعد عوام کو پتہ چلے گا۔ یہاں ایک اخباری کانفرنس سے خطاب کرتے ہوئے ایڈی یورپا نے کہاکہ وزیراعلیٰ سدارامیا نے اب تک جو دھاندلیاں کی ہیں ان کی 101فی صد دستاویزات ہمارے پاس موجود ہیں۔ ایڈی یورپا نے بتایا کہ اس سے قبل بھی سدارامیا اور ان کی کابینہ کے ساتھیوں کی دھاندلیوں سے متعلق بی جے پی نے چارج شیٹ جاری کی تھی لیکن اس وقت چند اہم دستاویزات ہمارے ہاتھ نہیں لگی تھیں۔ اب چند اہم دستاویزات ہمارے ہاتھ لگی ہیں جس کے جاری کرنے سے ریاستی کانگریس حکومت کی پول کھل جائے گی۔ انہوں نے بتایاکہ ان دستاویزات کی بنیاد پر وزیراعلیٰ اور ان کے کابینہ ساتھیوں کے خلاف چارج شیٹ جاری کی جائے گی۔ انہوں نے بتایاکہ آرٹی آئی کے تحت ایسی دستاویزات حاصل کرنے کے لئے چند شرائط پوری کرنی پڑتی ہیں۔ ایڈی یورپا نے کہاکہ اب چند ہی دنوں میں وزیراعلیٰ سدارامیا کتنے دیانتدار ہیں اس معاملہ کی تفصیل لوگوں کو معلوم ہوجائے گی۔ انہوں نے کہاکہ مختلف سرکاری گھپلوں کی تفصیلات اور دھاندلیوں کی تفصیل جاری کریں گے۔ ریاستی حکومت پر انہوں نے الزام لگایا کہ سدارامیا کی قیادت والی ریاستی حکومت میں رشوت عام ہے۔ بغیر رشوت کے کوئی سرکاری کام نہیں ہوتا۔ تمام اعلیٰ افسران تو موجود ہیں ان سے کام لینے کے لئے وزراء ودھان سودھا آتے ہی نہیں۔ اس کے باوجود وزیراعلیٰ زبان پر جو آیا بکواس کرتے ہیں اگلے انتخابات میں عوام کانگریس کو سبق سکھائے گی۔ سینئر صحافی گوری لنکیش کے قتل سے متعلق کانگریس کے نائب صدر راہل گاندھی کے دیئے گئے بیان سے متعلق جانچ کرنے کا ایڈی یورپا نے مطالبہ کیا۔ اس قتل سے متعلق راہل گاندھی نے بی جے پی اور آر ایس ایس کا ہاتھ ہونے کا جو الزام لگایا ہے اس سے متعلق جانچ کے دوران راہل گاندھی سے بھی پوچھ گچھ کرنا چاہئے کہ کس بنیاد پر انہوں نے یہ الزام لگایا ہے ان سے اس کا ثبوت طلب کرنا چاہئے۔