موربی، 29نومبر(ایس او نیوز؍آئی این ایس انڈیا) وزیر اعظم نریندر مودی نے گجرات انتخابات میں سب اہم ایشو بنے جی ایس ٹی کو گبر سنگھ ٹیکس بتا کر ان کی حکومت پر حملہ کرنے والے کانگریس نائب صدر راہل گاندھی پر آج ایک نئے انداز میں جوابی وار کرتے ہوئے کہا کہ اس نئے ٹیکس سسٹم کو لے کر نئے ماہر اقتصادیات (مسٹر گاندھی)گرانڈ اسٹوپڈ تھاٹ (زبردست بے وقوفی والی سوچ )کا اظہار کر رہے ہیں۔ مسٹر مودی نے یہاں انتخابی ریلی میں کہا-میں حیران ہوں کہ بہت سے نئے ماہر اقتصادیات اور ذہین لوگ جنہوں نے زندگی بھر عوام کی تجوری پر ڈاکہ مارا ہو، انہیں ڈاکوؤں کے سوائے کچھ یاد نہیں آتا۔ لہذا آج ایک نیا گرانڈ اسٹوپڈ تھاٹ یعنی جی ایس ٹی کی بات ہو رہی ہے۔انہوں نے کہا کہ یہ غریب کی بات کرتے ہیں اور چاہتے ہیں کہ نمک، جوتے، سستے کپڑے اور عام لوگوں کی ضرورت کی چیزوں پر 18 فیصد ٹیکس لگا دیا جائے اور شراب، کینسر کو بلاوا دینے والی سگریٹ، مہنگی گاڑیوں جیسی چیزوں کو سستا کردیا جائے۔ ان پر ٹیکس 28 سے گھٹا کر 18 فیصد کر دیا جائے۔ اس گرانڈ اسٹوپڈ تھاٹ سے بڑی غریب مخالف بات کیا ہو سکتی ہے۔مسٹر مودی نے کہا کہ جی ایس ٹی کے بارے میں حکومت کے فیصلوں میں چھوٹی بڑی چوک رہ گئی ہو تو عوام کے کہنے پر اسے تبدیل کر دیا جائے گا۔ موربی کی سیمرک صنعت کے معاملے میں بھی شرح کم کر دیا گیا۔مسٹر مودی نے نوٹ بندی کو بھی بڑا انتخابی مسئلہ بنا رہی کانگریس پر حملہ بولا۔ انہوں نے کہا-ملک کی تجوریوں کو لوٹنے کے بعد عوامی فلاح کی بات کرنے والے اب بھی نوٹ بندی،نو ٹ بندی-نوٹ بندی کہتے پھر رہے ہیں۔ اس سے عام لوگوں کو کوئی تکلیف نہیں ہوئی لیکن جسے تکلیف ہوئی ہے ان کے آنکھ کے آنسو 12 مہینے بعد بھی خشک نہیں ہو رہے۔ تم نے عوام کو لوٹا ہے مودی تمہارے پاس سے یہ سب نکال دے گا۔