عوام کو گمراہ کرنے، فوج پر شک پیدا کرنے کے لیے ملک سے معافی مانگیں راہل: امت شاہ
نئی دہلی،14؍ دسمبر (ایس او نیوز؍آئی این ایس انڈیا) فرانس سے 36 لڑاکا طیاروں کی خریداری کے معاملے میں بدعنوانی کے الزامات پر مودی حکومت کو سپریم کورٹ کی کلین چٹ ملنے کے بعد کانگریس صدر پر نشانہ لگاتے ہوئے بی جے پی صدر امت شاہ نے جمعہ کو کہا کہ عوام کو گمراہ کرنے اور فوج کے بارے میں شک پیدا کرنے کے لئے راہل گاندھی کو ملک کے عوام سے معافی مانگنی چاہئے۔شاہ نے کہا کہ ملک کو گمراہ کرنے کی ایسی کوشش پہلے کبھی نہیں ہوئی۔راہل گاندھی ملک کے عوام کو جواب دیں کہ وہ کس بنیاد پر ملک کے عوام کو گمراہ کر رہے تھے؟ ان الزامات کے بارے میں معلومات کا ذریعہ کون تھا؟ بی جے پی صدر نے یہاں پارٹی ہیڈکوارٹر میں صحافیوں کو بتایاکہ ملک کی آزادی کے بعد سے ایک جھوٹ کی بنیاد پر ملک کے عوام کو گمراہ کرنے کا اس سے بڑی کوشش کبھی نہیں ہوئی اور یہ بدقسمتی کی بات ہے کہ یہ کوشش ملک کی سب سے پرانی پارٹی کانگریس کے صدر کی طرف سے کی گئی۔ راہل گاندھی پر’بچکانی حرکت‘کرنے کا الزام لگاتے ہوئے شاہ نے کہا کہ کانگریس صدر نے اپنے اور اپنی پارٹی کے فائدے کے لئے جھوٹ کا سہارا لے کر چلنے کی ایک نئی سیاست کی شروعات کی اور سپریم کورٹ کے فیصلے نے آج ثابت کر دیا ہے کہ جھوٹ کے پاؤں نہیں ہوتے اور آخر میں جیت سچائی کی ہی ہوتی ہے۔بی جے پی صدر نے کہا کہ کانگریس پارٹی اور اس کے چیئرمین ہرجگہ الزام لگا رہے تھے، لیکن سپریم کورٹ کے فیصلے سے دودھ کا دودھ، پانی کا پانی ہو گیا اور کانگریس صدر گاندھی کے حکومت کے خلاف پروپیگنڈہ مہم کو بے نقاب ہو گیا ہے۔انہوں نے سوال کیا کہ جب کانگریس پارٹی کی حکومت کے وقت میں سال 2007 میں سودے کا سانچہ تیار ہوا پھر اسے 2007 سے 2014 تک حتمی شکل کیوں نہیں دی گئی۔ کیا اس میں کسی طرح کے کمیشن کی بات تھی؟ شاہ نے کہا کہ مودی حکومت نے فرانس کے ساتھ حکومت سے حکومت کی سطح پر نمٹنے کے جس میں کوئی بچولیا نہیں تھا اور پورا معاملہ صاف و شفاف تھا جس پر عدالت نے بھی مہر لگائی ہے۔انہوں نے کہا کہ ہمارا سوال ہے کہ کانگریس قیادت یو پی اے حکومت کے دوران حکومت سے حکومت کی سطح پر سودے کو آگے کیوں نہیں بڑھایا گیا۔امت شاہ نے کہاکہ رافیل خریداری کے سلسلے میں عوام کو گمراہ کرنے اور فوج کے بارے میں شک پیدا کرنے کے لئے راہل گاندھی کو ملک کے عوام سے معافی مانگنی چاہئے۔کانگریس صدر پر نشانہ لگاتے ہوئے انہوں نے کہا کہ آج سچ کی جیت ہوئی ہے۔آج ثابت ہوگیاہے کہ چور چور وہی چلاتے ہیں جنہیں چوکیدار کا خوف ہوتاہے۔