رافیل طیاروں پر راہل گاندھی کا اجلاس تشہیری ہے مخلوط حکومت مسائل حل کرنے میں ناکام ، کمارسوامی مندر درشن بند کریں: شوبھا کرند لاجے
بنگلورو،14؍اکتوبر(ایس او نیوز) بھارتیہ جنتا پارٹی ( بی جے پی) کی رکن پارلیمان وریاستی جنرل سکریٹری شوبھا کرند لاجے نے کانگریس پرالزام تراشی کرتے ہوئے کہا کہ رافیل جنگی طیاروں کے متعلق کانگریس صدر راہل گاندھی نے صرف تشہیر کے مقصد سے شہر میں اپنا پروگرام کیا ہے ۔ کانگریس صدر راہل گاندھی جھوٹے الزامات کو سامنے رکھ کر شہر میں عوامی اجلاس کیا ہے اور ممنوعہ علاقہ منسک اسکوائر میں پروگرام کیا جانا غلط ہے۔ انہوں نے کہا کہ کس بنیاد پر کانگریس صدر نے یہاں پروگرام کیا ہے ۔
اخباری نمائندوں سے بات کرتے ہوئے انہوں نے بتایا کہ اس سے قبل مرکز میں جب کانگریس کی قیادت والی یو پی اے بر سراقتدار تھی اس وقت کئی عوامی کارخانوں اور کمپنیوں پر تالے لگادےئے گئے تھے۔ ملک بھر میں مشہور گھڑیاں تیار کرنے والے ایچ ایم ٹی کارخانہ بند ہونے کیلئے کانگریس راست ذمہ دار ہے۔شوبھا نے کہا کہ کانگریس کے دور اقتدار کے دوران ملک میں گھوٹالہ نہیں ہوئے تھے؟ رافیل جنگی طیاروں کی خریدی میں کوئی بھی بد عنوانی نہیں ہوئی ۔ اس کے باوجود کانگریس اس کو گھوٹالہ قرار دے کر سستی شہرت حاصل کرنے کی کوشش کررہی ہے۔ انہوں نے بتایا کہ رافیل جنگی طیاروں کے متعلق ایچ اے ایل کے اعلیٰ افسر اور فوج کے سربراہوں نے بھی اس کی وضاحت کی ہے لیکن کانگریس بلاوجہ الزامات لگا رہی ہے ۔انہوں نے تنقید کرتے ہوئے کہا کہ ملک میں کانگریس کی لہر ختم ہوچکی ہے ۔ کانگریس کرناٹک سے ہی ابھری تھی اور یہیں ختم ہوگی ۔
انہوں نے کہاکہ مہا گٹھ بندھن سے بی ایس پی خود کو الگ کرلی ہے ، جس کااثر ریاست میں بھی دکھائی دیا ہے ۔ پرائمری وسکینڈری تعلیم کے وزیر مہیش نے اپنا استعفیٰ پیش کیا ہے۔ انہوں نے ریاستی حکومت کو نشانہ بناتے ہوئے کہا کہ مخلوط حکومت عوامی مسائل حل کرنے میں پوری طرح ناکام رہی ہے ۔وزیر اعلیٰ ایچ ڈی کمار سوامی اپنا زیادہ وقت مندروں میں گزارنے لگے ہیں۔ یہ حکومت کہاں ہے اس کی کسی کو خبر نہیں ہے ۔ کونسا وزیر کونسا قلمدان نبھارہا ہے ، اس کے متعلق بھی کوئی جانکاری نہیں ہے ۔انوہں نے کہا کہ اپنی ناکامیوں پر پردہ ڈالنے کے مقصد سے وزیر اعلیٰ بلا وجہ بی جے پی پرالزام تراشی کرنے لگے ہیں ۔شوبھا نے کہا کہ ریاست میں قانون اور انتظامیہ ابتر ہوچکا ہے ۔ ہیماوتی واٹر ریزرو ڈیم کو ڈینا مٹ کے ذریعہ اڑا دینے کی بات جنتادل ( سکیولر) رکن اسمبلی شیو لنگے گوڈا کرنے لگے ہیں ۔ لیکن افسوس کہ ابھی تک گوڈا کے خلاف کوئی اقدام نہیں کیا گیا ہے ۔ انہوں نے کہا کہ رام نگرم میں مشتبہ دہشت گرد کی گرفتاری کے باوجود وزیر اعلیٰ بنگلہ دیشی باشندوں کے حق میں باتیں کرنے لگے ہیں ۔ ملک میں پیش آنے والی می۔ ٹوتحریک کا خیر مقدم کرتے ہوئے شوبھا کرنے کہا کہ خواتین پر ہورہے مظالم پر روک لگے گی ،اس لہر سے خواتین کو انصاف ضرور ملے گا۔