4؍ اگست کو رائچور میں راہول گاندھی کی ریلی
بنگلورو،24؍ جولائی(ایس او نیوز) آنے والے اسمبلی انتخابات کی تیاریوں کو اور بھی شدت کے ساتھ آگے بڑھانے کیلئے کرناٹک پردیش کانگریس کی طرف سے 4؍ اگست کو رائچور میں ایک بہت بڑا جلسۂ عام منعقد کیا جارہا ہے، جس میں کانگریس نائب صدر راہول گاندھی شرکت کریں گے۔ کرناٹک پردیش کانگریس کمیٹی کے کارگذار صدر برائے شمالی کرناٹک ایس آر پاٹل کی نگرانی میں اس کنونشن کیلئے تیاریاں زوروں پر جاری ہیں۔ بتایاجاتاہے کہ شمالی کرناٹک میں پارٹی نے چار پانچ مقامات پر اس طرح کے کنونشن منعقد کرنے کا منصوبہ تیار کیا ہے۔اس کڑی کا پہلا کنونشن باگلکوٹ میں ایس آر پاٹل کے عہدہ سنبھالنے کی تقریب کے ساتھ منعقد ہوا۔ شمالی کرناٹک کے چاروں روینیو ڈویژنوں میں اس طرح کے کنونشن منظم کرنے کا پارٹی نے فیصلہ کیا ہے۔ خاص طور پر شمالی کرناٹک کو آئین کی دفعہ 371J کے تحت خصوصی درجہ دئے جانے اور اس علاقہ کی ترقی یقینی بنانے کیلئے ریاستی حکومت کی طرف سے اٹھائے گئے اقدامات کا کانگریس بھرپور فائدہ اٹھانا چاہتی ہے۔ اسی مقصد کے تحت شمالی کرناٹک میں کانگریس کی طرف سے بڑی تعداد میں کنونشنوں کے اہتمام کی تیاری کی جارہی ہے۔ 4اگست کے کنونشن میں راہول گاندھی کے علاوہ کرناٹک میں کانگریس امور کے انچارج کے سی وینو گوپال ، وزیراعلیٰ سدرامیا ، لوک سبھا میں کانگریس پارٹی کے لیڈر ملیکارجن کھرگے، کے پی سی سی صدر ڈاکٹر جی پرمیشور،کارگذار صدور دنیش گنڈو راؤ ، ایس آر پاٹل، ریاستی وزراء شرن پرکاش پاٹل، ودیگر کے علاوہ کئی پارٹی قائدین موجود رہیں گے۔