نئی دہلی 10/ستمبر (ایس او نیوز/ایجنسی): پٹرول ڈیزل کے دام میں لگاتار ہورہے  اضافہ پر نریندر مودی حکومت کو گھیرنے کے لئے کانگریس کی طرف سے بلائے گئے 'بھارت بند' کے تحت پیر کو ہوئے احتجاج میں کانگریس صدر راہل گاندھی نے بی جے پی کی مرکزی حکومت پر کئی حملے کئے۔  انہوں نے پی ایم مودی کی خاموشی پر بھی سوال اٹھائے اور کہا کہ پی ایم مودی کچھ نہیں کہتے.آگے کہا کہ  نوجوان، کسان اور ہماری خواتین مودی کا جواب سننا چاہتی ہیں۔

 صدر راہل گاندھی نے کہا کہ روپیہ اپنی سب سے نچلی سطح پر ہے اور پٹرول کی قیمتیں سب سے زیادہ ہیں ۔ انہوں نے کہا کہ سال 2014 میں وزیر اعظم بننے کے بعد نریندر مودی نے بڑے بڑے وعدے کئے تھے ، مگر اپنا ایک بھی وعدہ پورا نہیں کرسکے ۔ راہل نے کہا کہ بدعنوانی ، مہنگائی ، خواتین کے خلاف جرائم پر وزیر اعظم نے چپی سادھ رکھی ہے ۔

بھارت بند کے موقع پر آج 20 سے زیادہ اپوزیشن پارٹیوں نے کانگریس صدر راہل گاندھی کے ساتھ راج گھاٹ سے رام لیلا میدان کی طرف مارچ کیا ۔ وہیں یو پی اے کی سربراہ سونیا گاندھی اور سابق وزیر اعظم منموہن سنگھ رام لیلا میدان پر دھرنے میں شامل ہوئے ۔

اس موقع پر سابق وزیر اعظم منموہن سنگھ نے نریندر مودی حکومت پر وعدوں کو پورا کرنے میں ناکام ہونے  کا الزام لگاتے ہوئے تمام اپوزیشن جماعتوں کا 'ملک کے اتحاد، سالمیت اور جمہوریت کو بچانے کے لئے متحد ہونے کا اعلان کیا.'

پٹرول-ڈیزل  کی آسمان چھوتی قیمتوں کے خلاف کانگریس سمیت پورے اپوزیشن نے آج بھارت بند کا اعلان کیا تھا. بند کے دوران ملک بھر سے مختلف تصاویر سامنے آ رہی ہیں. بہار میں کئی جگہ احتجاج کے دوران  تشدد ہونے کی اطلاعات ملی ہیں، کئی جگہ آگ زنی ہوئی ہے اور اس کے علاوہ ٹرینوں کو بھی روکا گیا ہے.

بھارت  بند کے دوران بہار کے جہان آباد میں  بھاری ٹریفک جام کے چلتے دو سال کی ایک بیمار بچی کی موت واقع ہوگئی۔ بتایا گیا ہے کہ بند کی وجہ سے پوری سڑک جام تھی اور بچی کو علاج کے لئے بذریعہ ایمبولنس  اسپتال لے جایا جارہا تھا لیکن وقت پر اسپتال پہنچنے میں ناکام ہونے کی وجہ سے بچی نے راستے میں ہی دم توڑ دیا۔اس تعلق سے  جہان آباد کے سنئیر آفسر نے بچی کی موت پر کہا کہ اس کے لئے اُس کے گھروالے زمہ دار ہیں، جو گھر سے ہی کافی تاخیر سے نکلے تھے۔ آفسر کے مطابق بچی کی موت کا بند یا ٹریفک جام سے کوئی لینا دینا نہیں ہے۔

کچھ جھلکیاں: 

 بھارت  بند  کے دوران ممبئی میں MNS کے کارکنوں کا  بی جے پی کونسلر کے دفتر پر حملہ 

بھارت بند کے دوران گجرات میں کئی کانگریسی لیڈروں کو حراست میں  لیا گیا. گجرات کے کانگریس کے سربراہ راجیو ساتو، گجرات کانگریسی صدر امیت چاوڑا، سمیت دیگر کانگریسیوں کو حراست میں لیا گیا۔

بہار کی راجدھانی پٹنہ  ہائی کورٹ کے سامنے تمام سیکورٹی انتظامات کے بیچ ہائی کورٹ کے   جج کو اندر جانے سے روکا گیا۔ یہاں سماج وادی پارٹی کے کارکنوں نے جج کی گاڑی کے سامنے ہنگامہ کیا۔

 ایم این ایس کارکنوں کی طرف سے  ممبئی میں کچھ جگہوں پر جبراً دکانوں کو بند کروانے کی بھی خبر 

اُترپردیش کے سابق وزیراعلیٰ اکھلیش یادو نے بتایا کہ بی جے پی کی سرکار کو خود پر اتنا گھمنڈ ہے کہ آج جب اپوزیشن کی طرف سے بند منایا جارہا ہے اور فیول کی قیمتوں کو گھٹانے کا مطالبہ کیا جارہا ہے    مگر بند کے چلتے بھی مرکزی حکومت نے فیول کی قیمتوں کو مزید بڑھادیا ہے۔

راہول گاندھی نے بند کے دوران اپنے خطاب میں کہا کہ آج پورا اپوزیشن یہاں ایک ساتھ بیٹھا ہے، ہم سب مل کر بی  جے پی کو ہٹانے کا کام کریں گے۔

بھارت بند کے دوران مینگلور میں ایم ایل سی ایون ڈیسوزا کی قیادت میں 28 اداروں نے متحدہ طور پر نکالی احتجاجی ریلی۔ ہمپن کٹہ سے ڈی سی دفتر تک نکلی ریلی۔

پٹرول اور ڈیزل کی قیمتوں میں ہورہے بھاری اضافہ کے خلاف مینگلور میں  بائک اور کار کو دھکا دیتے ہوئے بھی لوگوں نے کیا ناراضگی کا اظہار۔بیل گاڑی بھی دوڑانے کا سامنے آیا منظر

بھارت بند کے دوران اُڈپی میں کانگریس اور بی جے پی کارکنوں کے درمیان جھڑپ کے بعد  پولس کا لاٹھی چارج ؛ پولس نے کیا حالات پر قابو۔

ریاست کرناٹک میں  بھارت بند کے دوران عام زندگی مفلوج؛  راستے نظر آئے سنسان؛ کئی جگہوں پر  بی جے پی  ہٹائو ، دیش بچائو کے نعرے۔ جگہ جگہ پر مظاہرے۔ 

بھارت بند پر مرکزی وزیرروی شنکر پرساد نے  ملک میں بڑھتی مہنگائی کو لے کر یہ کہہ کر پلّہ جھاڑنے کی کوشش کی کہ   پٹرول اور ڈیزل کی قیمتوں میں اضافے پر سرکار کا کوئی کنٹرول نہیں ہے۔