غریب افراد کوپانچ اور دس روپئے میں تین وقت کا کھانا، راہل گاندھی نے اندرا کینٹینس کا افتتاح کیا، ہر دن 500افراد کو غذا کی فراہمی کا نشانہ
بنگلورو:16/اگست(ایس او نیوز) ریاستی کانگریس حکومت نے اے آئی سی سی کے نائب صدر راہل گاندھی کی جانب سے سلسلہ وار اندرا کینٹنس کے افتتاح کے ذریعہ اس ہائی ٹیک شہر میں غریب ترین افراد کو سبسڈی پر غذا کی فراہمی کی نئی مقبول عام اسکیم کا آغاز کیا۔ چار سال پہلے حلف برداری کے اندرون چند گھنٹے ایک روپیہ میں چاول کی تقسیم کی اسکیم متعارف کرنے کا سہرا وزیراعلیٰ سدارامیا کے سر جاتا ہے ،انہوں نے اس نئے قدم کو ریاست کو بھوک سے پاک بنانے کی کوشش قرار دیا ہے ۔شہر میں 101 کینٹنس ہوں گے ۔198 کینٹینوں کے قیام کا مقصد ہے ، اس طرح ہر کارپوریشن وارڈ میں ایسی کینٹین ہوگی ۔ناشتہ پانچ روپئے ، لنچ اور ڈنر دس روپئے میں دیا جائے گا۔ہر کینٹین میں ہر دن 500 افراد کو غذا کی فراہمی کا نشانہ ہے اور اس تعداد میں اضافہ طلب کی بنیاد پر ہوسکتا ہے سٹی کارپوریشن کے حکام نے یہ بات بتائی ۔اس وینچر پر سدارامیا حکومت کو مبارکباد پیش کرتے ہوئے گاندھی نے کہا '' ریاستی حکومت تمام شہروں میں اندرا کینٹنس قائم کرنے جارہی ہے ۔ اس کا مقصدیہ ہے کہ کوئی بھی بھوکا نہ رہنے پائے ۔یہ آنجہانی وزیراعظم اندراگاندھی کا خواب تھا کہ اس بات کو یقینی بنایاجائے کہ کوئی بھی شہری بستر پر بھوکا پیٹ نہ جائے ۔''انہوں نے ریاستی حکومت پر زور دیا کہ وہ عوام کی صحت کو ذہن میں رکھتے ہوئے صاف ستھرے ماحول میں معیاری غذا فراہم کرے جو اہم ہے ۔غذا کی فراہمی شہریوں کا بنیادی حق ہے اور اس ماڈل کو قومی سطح پر لے جانے کی ضرورت ہے ۔اس سے مزدور طبقہ،آٹو ڈرائیورس،معمر شہریوں اور مختلف وجوہات کی بنا پر شہر آنے والے لوگ جو پرائیویٹ ہوٹلوں کی جانب سے وصول کی جانے والی بھاری رقم کو ادا کرنے میں دشواری محسوس کر رہے ہیں، کو فائدہ پہنچے گا۔اس کے ذریعہ لوگوں کو کام پرتوجہ دینے میں مددملے گی ۔ یہ لوگ ملک کی معاشی ترقی کے لئے کام کر رہے ہیں ۔اس کے بجائے وہ ایک دن دو وقت کے کھانے کیلئے مشکل محسو س کر رہے ہیں، جو ان کی بقا کیلئے ضروری ہے ۔ سدارامیاحکومت نے خط غربت سے نیچے زندگی گزارنے والے افراد کو چاول ، گیہوں ،جوار کی عوامی نظام تقسیم کے ذریعہ مفت تقسیم کے بعد اس نئے وینچر کا آغاز کیا ہے ۔اس موقع پر خطاب کرتے ہوئے سدارامیا نے کہا کہ ہر ماہ تقریباً1.08لاکھ خاندانوں کو سات کیلو چاول سپلائی کیاجارہا ہے ۔یہ چاول مفت دیا جاریا ہے ۔انہوں نے کہا کہ دیہی عوام کے نشانہ کیلئے شروع کردہ آروگیہ بھاگیہ اسکیم کے آغاز پر وہ خوشی محسوس کرتے ہیں۔